Májilis temirjol jolaýshylar kóligine qatysty túzetýler engizýdi kózdeıtin zań jobasyn qaraýǵa kirisedi
ASTANA. QazAqparat - Parlament Májilisi temirjol jolaýshylar kóligine qatysty túzetýler engizýdi kózdeıtin zań jobasyn qaraýǵa kiristi. Búgin Palatanyń jalpy otyrysynda atalǵan zań jobasy boıynsha jumys istep, qorytyndy ázirleý mindeti Májilistiń Ekonomıkalyq reforma jáne óńirlik damý komıtetine júkteldi.
Aıta ketý kerek, «Qazaqstan Respýblıkasynyń keıbir zańnamalyq aktilerine temirjol jolaýshylar kóligi máseleleri boıynsha ózgerister men tolyqtyrýlar engizý týraly» Qazaqstan Respýblıkasy Zańynyń jobasyn Úkimet jýyrda Májilistiń qaraýyna usynǵan bolatyn. Zań jobasy QR Prezıdentiniń 2014 jylǵy 13 qańtardaǵy № 725 Jarlyǵymen bekitilgen Qazaqstan Respýblıkasy kólik júıesiniń ınfraqurylymyn damytýdyń jáne yqpaldastyrýdyń 2020 jylǵa deıingi memlekettik baǵdarlamasyn iske asyrý úshin ázirlengen.
Ázirleýshilerdiń paıymdaýy boıynsha, zań jobasynyń maqsaty - uzaq merzimdi negizde jeke ınvestıtsııalardy tartý arqyly temirjol jolaýshylar tasymalyn memlekettik retteýdiń jáne uıymdastyrýdyń biryńǵaı júıesiniń jumys isteýine quqyqtyq negiz jasaý.
Zań jobasynda birqatar mańyzdy máseleler qamtylǵan, sonyń ishinde ınvestıtsııalardy tartý esebinen temirjol jolaýshylar vagondary parkiniń tozý dárejesin tómendetý, áleýmettik mańyzy bar qatynastarda jolaýshylar tasymalyna baǵany memlekettik retteý tıimdiligin arttyrý kózdelip otyr.
Jańa zań jobasymen «Qazaqstan Respýblıkasyndaǵy kólik týraly», «Tabıǵı monopolııalar jáne retteletin naryqtar týraly» jáne «Temirjol kóligi týraly» qoldanystaǵy zańdarǵa ózgerister men tolyqtyrýlar engiziledi.
Endi Palatanyń qabyldanǵan qaýlysyna sáıkes Májilistiń Ekonomıkalyq reforma jáne óńirlik damý komıteti jumys tobyn qurady, zań jobasy jumys tobynyń otyrystarynda talqylaýdan ótedi dep kútilýde.
