Májilis tehnıkalyq retteý týraly qujatty maquldady
NUR-SULTAN. QazAqparat – Parlament Májilisiniń jalpy otyrysynda «Tehnıkalyq retteý týraly» zań jobasy ekinshi oqylymda maquldandy, dep habarlaıdy QazAqparat.
Zań jobasy QR Prezıdenti Qasym-Jomart Toqaevtyń 2020 jylǵy 24 qańtarda Úkimettiń keńeıtilgen otyrysynda aıtylǵan tehnıkalyq retteý týraly zańdy jańa redaktsııada daıyndaý qajettigi týraly tapsyrmasyn iske asyrý maqsatynda ázirlendi.
Osy zań jobasy 2020 jylǵy 11 qarashada birinshi oqylymda maquldandy.
Budan basqa, depýtattar Qazaqstan Respýblıkasynyń qoldanystaǵy zańnamasyna jáne zań tehnıkasynyń talaptaryna sáıkes keltirý jónindegi, sondaı-aq zań jobasynyń jekelegen normalaryn naqtylaıtyn ári mazmunyn jaqsartatyn túzetýler engizdi.
Qujattaǵy erejelerdi zańnamalyq turǵydan bekitý - aıtarlyqtaı oń nátıjelerge ákeletinin jáne Úkimettiń arsenalynda bar tehnıkalyq retteý ári tutynýshylardyń quqyqtaryn qorǵaý quraldaryn tolyq paıdalanýǵa negiz qalaıdy. Sondaı-aq, usynylyp otyrǵan jańa zańnamalyq baza memleket úshin baqylaý-qadaǵalaý qyzmetiniń aıqyndyǵyn arttyrýǵa, qaýipti ónimniń naryqqa shyǵýyna jol bermeýge, sybaılas jemqorlyq qaýpin tómendetýge, bıznes úshin adal kásipkerlikke jaǵdaı jasaýǵa, tutynýshy úshin neǵurlym sapaly ónimdi tańdaýǵa múmkindik beredi.
Jumys tobyna Májilistiń turaqty komıtetteri men depýtattarynan 253 usynys kelip tústi, olar jumys tobynyń on bes otyrysynda, Komıtettiń keńeıtilgen otyrystarynda múddeli mınıstrlikter, vedomstvolar ókilderiniń, bıznes qoǵamdastyq ókilderi men sarapshylardyń qatysýymen talqylandy.
Sonymen qatar jalpy otyrysta «Qazaqstan Respýblıkasynyń keıbir zańnamalyq aktilerine tehnıkalyq retteý máseleleri boıynsha ózgerister men tolyqtyrýlar engizý týraly» ilespe zań jobasy da ekinshi oqylymda maquldandy.
