Májilis tarıhı-mádenı mura nysandaryn qorǵaý týraly zań jobasyn maquldady
NUR-SULTAN. QazAqparat – Parlament Májilisiniń jalpy otyrysynda «Tarıhı-mádenı mura obektilerin qorǵaý jáne paıdalaný týraly» zań jobasy ekinshi oqylymda maquldandy, dep habarlaıdy QazAqparat tilshisi.
Zań jobasy tarıhı-mádenı mura nysandaryn qorǵaý jáne paıdalaný salasyndaǵy zańnamalyq bazany jetildirý maqsatynda ázirlendi.
«Zań jobasyna sáıkes, endigi jerde tarıhı-mura obektisine tarıh jáne mádenıet eskertkishteri mártebesi burynǵydaı sol obekt ashyla salysymen berilmeıdi. Bul mártebe endi onyń tarıhı mańyzdylyǵyn aıqyndaıtyn tarıhı-mádenı saraptama jasalǵannan keıin ǵana beriledi. Áıtpese, bir kezde ashylǵan muranyń talaıy áli kúnge zerttelmegen, qazylmaǵan, restavratsııalanbaǵan kúıinde jatyr, ıaǵnı tek tizimde tur. Aldaǵy kezde úsh jyldyń ishinde, keı jaǵdaıda bes jyldyń ishinde olardyń qundylyǵynyń basy ashylady da, jumys josparly túrde basymdyq boıynsha júrgiziledi. Kim kóringen qolyna kúrek alyp, «qara arheologııamen» aınalysa bermeıtin bolýy úshin aldaǵy kezde arheologııalyq jáne ǵylymı-restavratsııalyq jumystardy ókiletti organnyń josparlaýy ári bergen lıtsenzııasy boıynsha júrgizý mindettiligi de zańdastyrylǵaly otyr», - dedi Májilis depýtaty Saýytbek Abdrahmanov.
Zań jobasy birinshi oqylymda 2019 jylǵy 13 aqpanda maquldanǵan.
Zań jobasyn jetildirý jáne ony ekinshi oqylymda qaraýǵa daıyndaý barysynda depýtattar qujattyń qurylymyn arttyrýǵa, jekelegen uǵymdardyń redaktsııasyn naqtylaý men jaqsartýǵa negizdelgen túzetýler eskerildi.
«Tarıhı-mádenı mura obektilerin qorǵaý jáne paıdalaný salasyndaǵy ýákiletti organnyń Qazaqstan Respýblıkasy dúnıejúzilik mádenı murasynyń aldyn ala tizimin qalyptastyrý jáne usyný, tarıhı-mádenı mura obektilerin qorǵaý jáne paıdalaný salasyndaǵy qyzmetti salaaralyq úılestirý, tarıh jáne mádenıet eskertkishterin qorǵaý jáne paıdalaný qaǵıdalaryn ázirleý men bekitý quzyretin normatıvtik bekitýge, sonda-aq zań jobasynyń jekelegen normalaryn naqtylaýǵa ári mazmunyn jasartýǵa baǵyttalǵan túzetýler engizildi», - dedi S. Abdrahmanov.
Onyń sózine qaraǵanda, jumys toby 200-ge jýyq túzetýdi qarap shyǵyp, olardyń 130-y qabyldanǵan.
