Májilis talqylaýyna usynylǵan zań jobasynda Ata zańǵa qarsy eshqandaı kúmándi jáıtter joq - R.Sárpekov
ASTANA. 3 aqpan. QazAqparat /Aıdar Ospanalıev/ - «Májilis depýtattary jańa zań qabyldaǵan saıyn onyń Ata zańymyzdyń talaptaryna sáıkestigin basshylyqqa alamyz.
Búgingi Májilis depýtattarynyń talqysyna túsip otyrǵan eki birdeı konstıtýtsııalyq zańǵa ózgerister men tolyqtyrýlar engizý de osy tártippen júzege asyryldy», - dedi búgin Parlament Májilisiniń depýtaty Ramazan Sárpekov.
Otyrys barysynda ol asa mańyzdy qoǵamdyq qatynastardy retteıtin, negizgi prıntsıpter men normalardy belgileıtin zańdar qabyldanǵan ýaqytta ol der kezinde halyqtyń nazaryna jetkeni oryndy ekendigin aıtty. «Qabyldanǵan zańdardyń maqsaty, qandaı qoǵamdyq qatynastardy sheshetin júıeleri barsha jurtqa túsinikti bolýy kerek. Al ony túsindirýge osy otyrǵan bizder - depýtattar mindettimiz»,-dedi R.Sárpekov.
Sondaı-aq ol sózinde keshe ǵana Elbasy Parlament qabyldaǵan Qazaqstan Respýblıkasy Konstıtýtsııasyna Prezıdenttiń kezekten tys saılaýyn taǵaıyndaý jáne ótkizý tártibi men merzimine qatysty zańǵa qol qoıǵandyǵyn atap kórsetti. «Al, qazir bizdiń talqylaýǵa túsip otyrǵan «Qazaqstan Respýblıkasyndaǵy saılaý týraly» jáne «Qazaqstan Respýblıkasynyń Prezıdenti týraly» Zańdarǵa tolyqtyrýlar men ózgerister engizýdi kózdeıtin zań jobasy keshe ǵana qabyldanǵan zańnyń iske asýyna múmkindik beretin normalardy qarastyryp otyr. Prezıdenttiń kezekten tys saılaýy Respýblıka Prezıdentiniń sheshiminen taǵaıyndalady jáne ol taǵaıyndalǵan kúnnen bastap 2 aı ishinde ótkiziledi. Kezekten tys saılaý «Qazaqstan Respýblıkasyndaǵy saılaý týraly» Zańda belgilengen tártippen ótkiziledi. Atap aıtqanda osy zańnyń erekshe bóliminiń 10-taraýynda Qazaqstan Respýblıkasy Prezıdentin saılaý tártibin qarastyrǵan. Saılaý is-sharalaryn ótkizý merzimin Qazaqstan Respýblıkasynyń Ortalyq saılaý komıssııasy aıqyndaıdy»,-dedi halyq qalaýlysy.
Sonymen qatar depýtat óz sózinde jalpy otyrystyń qaraýyna usynylǵan zań jobasy jumys tobynda jan-jaqty talqylanyp, talqylaý barysynda depýtattarmen qatar Joǵarǵy sot, Bas prokýratýra, Ortalyq saılaý komıssııasy, Ádilet mınıstrligi jáne de basqa memlekettik organdarynyń jaýapty laýazymdy tulǵalary qatysyp, olardyń pikirleri tyńdalǵandyǵyn jetkizdi. «Ata Zańǵa qarsy eshqandaı kúmándi jáıtter joq», -dedi depýtat.
