Májilis taǵy bir elmen sottalǵan adamdardy berý shartyn maquldady
NUR-SULTAN. QazAqparat - QR Parlament Májilisiniń depýtattary Qazaqstan men Lıtva arasynda sottalǵan azamattardy berýge qatysty shartty ratıfıkatsııalaýǵa kelisti. Ol tizimge májbúrli túrde medıtsınalyq emdeýge jiberilgen azamattar da kiredi, dep habarlaıdy QazAqparat tilshisi.
QR Bas prokýrorynyń orynbasary Marat Axmetjanovtyń aıtýynsha, atalǵan qujat osydan eki jyl buryn Vılnıýs qalasynda rásimdelgen bolatyn. Oǵan sáıkes, Lıtvada Qazaqstan azamatyn sottasa, ıa bolmasa, májbúrlep emdeýge jiberse, ondaı azamattar jazany óz elinde óteıtin bolady. Lıtva Respýblıkasynyń azamattaryna qatysty sharalar da sondaı bolady.
"Shartta birqatar talaptar bar. Aldymen ol bizdiń Qazaqstannyń nemese Lıtvanyń azamaty bolýy tıis. Sottalǵan adamnyń nemese onyń zańdy ókiliniń kelisimi kerek. Eki elde de onyń jasaǵan áreketi qylmys bolyp tabylýy tıis. Berýge eki jaqtyń da kelisimi bolýy shart. Suraý kelip túsken kezden jazany kem degende alty aı ótemegen bolýy tıis", - dedi M.Axmetjanov Májilistik plenarlyq otyrysynda.
Qujat boıynsha berýge jatpaıtyn adamdar da bar. Birinshiden, sottalǵandardyń eline qaıtarý egemendik pen qoǵamdyq tártipke nuqsan keltirse jáne ulttyq zańnama men memlekettiń múddesine qaıshy bolsa, ondaı azamattar berilmeıdi. Ekinshiden, sottalǵan adam keltirgen zalaldy ótemese, sol jerde qala beredi.
"Lıtvamen aradaǵy sharttyń bir ereksheligi bar. Ol - medıtsınalyq májbúrleý sharasy qoldanylǵan adamdy berý máselesi. Qazirgi kezde atalǵan máseleni tek úsh xalyqaralyq konventsııa ǵana retteıdi. Birinshisi - 1999 jylǵy qylmystyq jazany shetelde óteý týraly amerıkaaralyq konventsııa. Ekinshisi - 1997 jylǵy psıxıkasy buzylǵan adamdardy májbúrlep emdeý úshin berý týraly TMD konventsııasy. Úshinshisi - sottalǵan adamdardy berý týraly 1998 jylǵy konventsııa. Lıtvamen shart osy konventsııalar men Qazaqstannyń Qylmystyq-protsessýaldyq kodeksine sáıkes keledi", - dep atap kórsetti M.Axmetjanov.
Búgingi otyrysta Májilis depýtattary "Qazaqstan Respýblıkasy men Lıtva Respýblıkasy arasyndaǵy bas bostandyǵynan aıyrýǵa sottalǵan adamdardy jáne medıtsınalyq sıpattaǵy májbúrleý sharalary qoldanylǵan adamdardy berý týraly" zańnyń jobasyn biraýyzdan maquldady.
