Májilis sý tasqynynan zardap shekkenderge bir kúndik jalaqylaryn aýdardy
Toqtala ketetin jaıt, otyrys barysynda depýtat Tólegen Ybyraev elimizdiń birqatar aımaqtarynda kúnniń kúrt jylýynan sý tasqyny oryn alyp, turǵyndarynyń ómirine qaýip tóngenin alǵa tartty. «Zardap shekken azamattardyń otbasyna, el-jurtqa Elbasynyń tapsyrmasy boıynsha keń kólemde tolyqtaı járdem kórsetilýde. Qomaqty qoldaý Úkimet tarapynan áli de kórsetileri sózsiz. Tótenshe jaǵdaı kezinde turmysyna aýyrlyq túsip, zardapqa ushyraǵan otbasylarǵa járdemdesý, der kezinde qol ushyn berý, el bolyp, jurt bolyp kómek berý - ata-saltymyz, ádep-ǵurpymyz. Qara jamylyp, qaıǵy basqan qazaly otbasylarǵa shyn júrekten kóńil aıtamyz. Kóppen kótergen júk jeńil. Tabıǵattyń tosynnan shyqqan joıqyn kúshiniń saldarynan kómekke zárý bolǵan jandar úshin qoldaý retinde Májilistegi «Nur otan» partııasy fraktsııasynyń atynan bir kúndik tabystaryńyzdy zardap shekken otbasylarǵa arnalǵan qorǵa bólýlerińizdi suraımyn», - dedi depýtat. «Tek «Nur Otan» fraktsııasynan ǵana emes, basqa da fraktsııalardan osyndaı usynys túsip jatyr. Barshańyzǵa rahmet. Apparat qarjy aýdarý jaǵyn uıymdastyrady», - dedi Májilis spıkeri Qabıbolla Jaqypov. Aıta keteıik, buǵan deıin Úkimette elimizdegi sý tasqynynyń jaǵdaıy talqylanǵan bolatyn. Іshki ister mınıstri Qalmuhanbet Qasymovtyń aqparatyna súıensek, «sý tasqyny saldarynan respýblıka oblystarynda 2 434 úı sý astynda qalyp, uzyndyǵy 25 shaqyrym 164 avtojol shaıylyp, 9 kópir qıraǵan». Mınıstrdiń sózine qaraǵanda, mundaı aýqymdaǵy sý tasqyny elimizde sońǵy on jylda oryn almaǵan eken.