Májilis strestik aktıvter naryǵyna qatysty qujatty maquldady
Bul zań jobasy Memleket basshysynyń 2021 jylǵy 1 qyrkúıektegi Qazaqstan halqyna Joldaýyndaǵy strestik aktıvterdi ekonomıkalyq aınalymǵa qaıtarý jónindegi tapsyrmasyna sáıkes ázirlendi. Osy zań jobasy 4 zańǵa ózgerister men tolyqtyrýlar engizýdi kózdeıdi jáne mynadaı negizgi baǵyttardan turady. Birinshiden, zań jobasynda strestik aktıvterdi avtorızatsııalanǵan satyp alýshylardyń qoldanystaǵy tizimin jeke ınvestorlardy qosý arqyly keńeıtý kózdeledi.
«Qazirgi ýaqytta Bankter týraly zańnyń 36-1-babyna sáıkes, avtorızatsııalanǵan satyp alýshylar tizimine ekinshi deńgeıdegi bankter, bankterdiń strestik aktıvterdi basqarý jónindegi enshiles uıymdary, Problemalyq kredıtter qory, kollektorlyq agenttikter jáne basqa da qarjy uıymdary kiredi. Bul rette, tizim keńeıtilip, bankterdiń jáne mıkroqarjy uıymdarynyń strestik aktıvterin jeke ınvestorlarǵa satý quqyǵy beriledi», - dedi QR Qarjy naryǵyn retteý jáne damytý agenttiginiń tóraǵasy Mádına Ábilqasymova.
Onyń aıtýynsha, jeke ınvestorlarǵa zańdy tulǵalardyń jáne dara kásipkerlerdiń qaryzdaryn satyp alýǵa ruqsat etiledi. Qaryz alýshy – jeke tulǵalardyń quqyqtaryn qorǵaý úshin zań jobasynda jeke tulǵalardyń kredıtterin ınvestorlarǵa satý kózdelmegen.
Zań jobasynda servıstik kompanııalar ınstıtýtyn qurý kózdeledi. Olar ınvestorlarǵa problemaly kredıtter boıynsha qyzmet kórsetý jáne basqarý qyzmetterin iske asyrady. Servıstik kompanııalar ınstıtýtyn damytý - strestik aktıvterdiń ótimdi naryǵyn qurý úshin qajetti jaǵdaı jasaıdy.
Qujatta jeke ınvestorlardyń satyp alynatyn qaryzdardy servıstik kompanııalarǵa senimgerlik basqarýǵa berý mindeti kózdeledi.
Budan buryn habarlanǵandaı, 2016 jyldan bastap bank sektoryn qalypqa keltirý boıynsha qabyldanǵan sharalar nátıjesinde 6,7 trln teńge somasyndaǵy strestik aktıvter esepten shyǵaryldy. 2022 jylǵy 1 qańtardaǵy jaǵdaı boıynsha strestik aktıvter mólsheri 2,3 trln teńgeni nemese bank júıesi aktıvteriniń 6 paıyzyn qurady.
