Májilis spıkerine Qabıbolla Jaqypovtyń kandıdatýrasy usynyldy
ASTANA. QazAqparat - Búgin Parlament Májilisiniń jalpy otyrysynda palata spıkeriniń kandıdatýrasy talqylanýda. Jıyn barysynda Májilis depýtaty Qýanysh Sultanov Tóraǵaǵa kandıdat retinde Qabıbolla Jaqypovty usyndy.
Eske sala keteıik, Konstıtýtsııaǵa sáıkes, Májilis Tóraǵasynyń qyzmetine kandıdatýrany Palatanyń depýtattary usynady. Al Parlament Májilisin memlekettik tildi erkin meńgergen óz depýtattarynyń arasynan depýtattar jalpy sanynyń kópshilik daýysymen jasyryn daýys berý arqyly saılaǵan tóraǵa basqarady.
Jaqypov Qabıbolla Qabenuly 1949 jyly 16 qyrkúıekte Batys Qazaqstan oblysy Qaztalov aýdany Qaztalov aýylynda dúnıege kelgen. Ulty - qazaq. Tselınograd ınjenerlik-qurylys ınstıtýtyn (1972) támamdaǵan, ınjener-qurylysshy; Almaty joǵary partııa mektebin (1989) bitirgen, saıasattanýshy. Tehnıka ǵylymdarynyń kandıdaty, Halyqaralyq Ekologııa akademııasynyń akademıgi. Qazaqstan Injenerlik akademııasynyń korrespondent-múshesi. Qazaqstan Respýblıkasy Ulttyq jaratylystaný ǵylymdary akademııasynyń akademıgi. 1993 jyldyń qańtarynan bastap 2001 jyldyń qańtaryna deıin (8 jyl boıy) Batys Qazaqstan oblysynyń ákimi qyzmetin atqaryp, osy óńirdiń ekonomıkalyq-áleýmettik damýy jolynda jemisti eńbek etti.
2001 jyldan - QR Kólik jáne kommýnıkatsııalar mınıstriniń birinshi orynbasary. 2003 jyldan - QR Premer-Mınıstri Keńsesi Basshysynyń orynbasary - Úkimettiń Parlament Senatyndaǵy ókili.
2007 jyldan - «Nur Otan» HDP-nyń tizimi boıynsha Parlament Májilisiniń depýtaty, Halyqaralyq ister, qorǵanys jáne qaýipsizdik komıtetiniń múshesi.
Elimizge sińirgen eńbegi úshin «Parasat» (2009) jáne «Qurmet» (1999) ordenderimen, birneshe mereıtoılyq medaldarmen marapattalǵan. Sondaı-aq ultaralyq kelisimge sińirgen qyzmetine oraı Reseı Federatsııasynyń ІІ dárejeli «Danııl Áýlıe» ordeni berilgen. Qazaqstan Respýblıkasynyń Qurmetti temirjolshysy. Qazaqstan Respýblıkasynyń Qurmetti qurylysshysy.
2012 jyldyń qyrkúıek aıynan bastap - besinshi saılanǵan Qazaqstan Respýblıkasy Parlamenti Májilisiniń depýtaty, Qazaqstan Respýblıkasy Parlamenti Májilisi Tóraǵasynyń orynbasary.
