Májilis spıkeri: Jol qozǵalysy zańnamasyndaǵy jańa erejeler jemqorlyqqa soqtyrady
ASTANA. QazAqparat - Búgin Parlament Májilisiniń jalpy otyrysynda palata tóraǵasy Qabıbolla Jaqypov osyndaı pikir bildirdi.
Toqtala ketetin jaıt, jıyn barysynda depýtat Merýert Qazbekova jol qozǵalysy týraly jańa zańnyń normalary qoǵam arasynda úlken rezonans týdyrǵanyn aıtyp, soǵan qatysty birqatar usynystar jasaǵan bolatyn.
Óz kezeginde Májilis spıkeri Qabıbolla Jaqypov zańnyń bundaı normalaryna qatysty qujatty ázirleýshiler men komıtet tóraǵalary tereńirek barýy kerektigin aıtty.
«Depýtat Qazbekova durys aıtady, bul tikeleı sybaılas jemqorlyqqa aparady. Budan soń, jańaǵy aptechkalar shyǵady. Onda úsh dáke dep tur, eki dáke bolyp shyqsa she? Tipti, sol úsheýdiń ornyna bir úlken dáke salyp qoısa ne bolady? Mine, mundaı jaǵdaıdyń bári jol boıynda turǵan serjanttarǵa sep bolady. Eshkim de eshteńeni dáleldeı almaıdy ǵoı. Olar: «úsh dáke bolýy kerek, qaıda?», «12 jasqa deıin avtooryndyq bolýy shart, qaıda?» dep kete beredi. Bul bizdiń jumys komıssııamyzdyń kemshiligi», - dedi Q.Jaqypov.
Jıyn barysynda depýtat Merýert Qazbekova jol qozǵalystaryna qatysty jańa erejelerge toqtala kele, onda kólik júrgizýshilerine 12 jasqa deıingi balalardy arnaıy ustap qalatyn qurylǵysyz alyp júrýge tyıym salatyn normaǵa erekshe nazar aýdardy. «Aq jol» partııasy fraktsııasynyń atynan ol joǵaryda aıtylǵan normalardy júzege asyrý úshin jáne avtooryndyqtarmen qamtamasyz etý úshin 12 aılyq merzimge ótpeli kezeń belgileýdi usyndy. Sonymen qosa, kórsetilgen merzim ishinde zańnyń osy normasyn qaıta qarap, onyń ishinde 6 jasqa deıingi balalardy avtooryndyqtarmen qamtýǵa qaraı jeńildetýdi, al 6-12 jasqa deıingi aralyqta bul norma mindetti emes, usynys retinde qarastyrylýy kerektigi týraly usynysyn bildirdi.
