Májilis spıkeri «jatypisher» bızneske jaǵdaı jasaýdy doǵarýdy usyndy
ASTANA. QazAqparat - QR Parlamenti Májilisiniń tóraǵasy Nurlan Nyǵmatýllın básekege qabileti joq bızneske jyly jaǵdaı jasaýdy doǵarýdy usyndy, dep xabarlaıdy QazAqparat.
«Árıne, memlekettik qoldaý otandyq ónim shyǵaratyn kásiporyndardyń damýyna yqpal etedi. Osy baǵytta birqatar qadamdar jasaldy. Bul jaǵdaı jergilikti qamtý úlesin arttyrdy. Biraq osyndaı qoldaýdyń arqasynda tek jaıly jaǵdaıda ómir súretin bıznester paıda boldy. Memlekettik satyp alýmen, memlekettik merdigerlik arqyly ǵana jumys jasaıdy. Bul nápaqasynan aıyrylǵan kezde, básekege múldem qabiletsiz bolyp shyǵady», - dedi Nyǵmatýllın «Nur Otan» partııasy fraktsııasynyń otyrysynda.
Májilis tóraǵasy Qazaqstan Búkilálemdik saýda uıymyna kirgenin jáne qazaqstandyq taýarlarly saýdalaý otandyq bıznestiń básekege qabilettiligine táýeldi bolatynyn eske saldy. Sondyqtan bıznesti tikeleı qoldaǵannan góri, kásipkerliktiń odan ári damýyna jaǵdaı jasaǵan jón. Ol úshin memleket pen bıznestiń seriktestigin jetildirip, memlekettik qoldaýdyń tıimdiligin arttyrý qajet.
Nyǵmatýllınniń aıtýynsha, memlekettik retteý keıde jaǵymsyz jaǵdaılarǵa alyp keledi. Bıznesti memlekettik qoldaý tetikterin sheneýnikter belgili bir kompanııa múddesine qoldanatyn kezder bolady.
