Májilis spıkeri: Úkimetten kelip túsetin zań jobalarynyń sapasy syn kótermeıdi
ASTANA. QazAqparat - Úkimetten kelip túsetin zań jobalarynyń sapasy syn kótermeıdi. Búgin Parlament palatalarynyń birlesken otyrysynda, sessııany qorytyndylap baıandama jasaǵan Májilis Tóraǵasy Qabıbolla Jaqypov osylaı málimdedi.
«Zań shyǵarý qyzmeti salasynda búginge deıin birqatar qordalanǵan problemalar áli de barshylyq. Birinshiden, bul jyl saıyn baıqalyp otyrǵan Úkimetten kelip túsetin zań jobalarynyń tıisti deńgeıdegi sapasynyń bolmaýy. Ótken kezeńdermen salystyrǵanda sapa birshama jaqsarǵan, alaıda jetildirý kókjıegin áli de baıqaı almaı otyrmyz», - dedi sessııany qorytyndylap negizgi baıandama jasaǵan Májilis spıkeri Qabıbolla Jaqypov. Onyń aıtýynsha, Parlamenttiń besinshi shaqyrylymynyń jumysy barysynda Úkimetten Májiliske 267 zań jobasy engizilgen. Olardyń 43-i zań jobalaryna qatysty talaptardyń oryndalmaýyna oraı, keri qaıtaryldy. Úshinshi sessııa barysynda Úkimet engizgen 114 zań jobalarynyń 38 paıyzy ǵana talaptarǵa tolyǵymen saı kelgen. «Mundaǵy aıqyn problemalardyń biri vedomstvoaralyq kelisimniń bolmaýynda. Profıldi memlekettik organdarmen ázirlengen zań jobalary basqa vedomstvolarmen nemquraıdy, atústi kelisile salady. Májilistegi jumys toptarynyń aıasynda ǵana naqty jaǵdaıǵa tııanaqty saraptar jasalyp, qandaı da bir normany qabyldaýdyń saldaryna baǵa berilýde. Sonyń nátıjesinde qujat 70-80 paıyzǵa deıin, jekelegen jaǵdaılarda tutastaı qaıta jazylyp júr. Mysaly, «Derbes derekter týraly», «Іshki ister organdary týraly», «Qarjy pıramıdalar qyzmetine qarsy is-áreketter týraly» zań jobalary týra solaı jasalǵan. Al «Azamattyq qorǵanys týraly» zań jobasyn depýtattar tutastaı qaıta jazyp shyqty. Bul rette depýtattar qujattyń ilespe zań jobasyna sý bógetteriniń qaýipsizdigin qamtamasyz etýdi retteıtin bapty tutas engizdi», - deıdi spıker Q. Jaqypov. Sonymen qatar, Májilis Tóraǵasy Úkimet tarapynan ázirleýshiler ózimizdiń ulttyq zańnamany eskermeı, sheteldik zań normalaryn tolyq kóshire salatynyn da synǵa aldy. Onyń sózine qaraǵanda, «Derbes derekter týraly» zań jobasynyń kóptegen normalary TMD-daǵy bir eldiń zań normalaryn tutastaı qaıtalap shyqqan. «Al osynyń ózi bizdiń ulttyq zańnamamyzǵa, onyń ishinde Qazaqstannyń 7 kodeksi men 27 zańyna qaıshy kelgen. Nátıjesinde depýtattarǵa zań jobasyn tolyǵymen qaıta daıyndaýǵa týra keldi», - dedi spıker.
