Májilis spıkeri Úkimet janynan Ulttyq zańnamany ǵylymı-saraptaý ınstıtýtyn qurý máselesin kóterdi
ASTANA. QazAqparat - QR Úkimeti janynan Ulttyq zańnamanyń ǵylymı-saraptaý ınstıtýtyn qury mańyzdy. Búgin Parlament palatalarynyń birlesken otyrysynda, sessııany qorytyndylap baıandama jasaǵan Májilis Tóraǵasy Qabıbolla Jaqypov osy máseleni kóterdi.
«Qurmetti Kárim Qajymqanuly, qurmetti Úkimet músheleri. Kóptegen mamandar men depýtattar elimizdegi zań shyǵarmashylyǵy jumysynyń deńgeıin halyqaralyq standarttarǵa deıin arttyrý úshin, Elbasy júktegen bizdiń quqyqtyq júıemizdi básekege qabiletti otyz eldiń deńgeıine jetkizý úshin qoldanystaǵy Konstıtýtsııa aıasynda birqatar memlekettik sharalar keshenin qabyldaý qajet. Olar negizinen Májiliske kelip túsetin zań jobalarynyń 90 paıyzyna bastama jasaıtyn Úkimettiń zańnamalyq qyzmetiniń sapasyn arttyrýǵa baǵyttalýy shart. Al osy keshendi sharalardyń biri qoǵam, onyń ishinde zańgerler tarapy biraz jyldar boıy usynyp kelgen ulttyq zańnamanyń ǵylymı-saraptaý ınstıtýtyn qurý bolyp otyr. Bundaı ınstıtýt kóptegen elderde bar. Instıtýt tıimdi jumys isteýi úshin ony Úkimet janynan qalyptastyrǵan da abzal», - dedi Qabıbolla Jaqypov. Bul rette atalmysh ınstıtýtqa quqyqtyń negizgi salalary boıynsha úzdik ǵalym-zańgerlerdi, kásibı mamandardy, ǵylymı kadrlardy toptastyrý qajettigin aıtqan spıker, búgingi tańda mınıstrlikter men vedomstvolar janynda zań shyǵarmashylyǵymen aınalysady dep qurylǵan ınstıtýttardyń da az emes ekenin aıtty. Olarǵa bıýdjetten qomaqty qarajat ta bólinip otyr. Alaıda, Májilis spıkeriniń aıtýynsha, olardyń jasaǵan zań jobalarynyń sapasy, ǵylymı-saraptamalyq qorytyndylary jaqsarta túsýdi qajet etedi. «Jańa ınstıtýt memlekettik quqyqtyq júıeniń ǵylymı damýyn qamtamasyz etetin biregeı ortalyq retinde elimizdiń basqarylatyn jáne baqylanatyn quqyq shyǵarmashylyǵy tujyrymdamasyn sapaly qalyptastyrýǵa múmkindik berer edi. Al búgingi Ádilet mınıstrligi janyndaǵy zań shyǵarmashylyǵy ınstıtýty óziniń qyzmet baǵytyn tolyq aqtap otyrǵan joq», - dep túıindeıdi Májilis Tóraǵasy.
