Májilis spıkeri tikushaq apatynan qaza bolǵandardyń otbasylaryna kóńil aıtty
NUR-SULTAN. QazAqparat - Májilis tóraǵasy Nurlan Nyǵmatýlın palata depýttarynyń atynan Qyzylorda oblysynda oryn alǵan oqıǵa saldarynan qaza bolǵan áskerı qyzmetshilerdiń otbasylary men jaqyndaryna kóńil aıtty, dep habarlaıdy QazAqparat.
«Qyzylorda oblysynda qaıǵyly oqıǵa oryn aldy. Jaýyngerlik mindetin atqarý barysynda 13 áskerı qyzmetshi kóz jumdy. Osy qaıǵyly jaǵdaıǵa baılanysty barlyq depýtattardyń atynan tik ushaq apatynan kóz jumǵan jaýyngerlerdiń otbasylaryna, týǵan-týystaryna qaıǵyryp kóńil aıtamyz», - dedi Palata spıkeri.
Bıýro otyrysynda Májilistiń aldaǵy jalpy otyrystyń kún tártibiniń jobasy qaraldy.
Palataǵa birinshi oqylymda turǵyn úı-kommýnaldyq sharýashylyq máselelerine qatysty zań jobasyn qaraý usynylady.
Zań jobasy kondomınıým obektilerin basqarý jáne kútip-ustaý boıynsha qyzmetti, ony resimdeý tártibin, ortaq múlikti kúrdeli jóndeý úshin aqsha qarajatyn jınaýǵa, osy protsesterge menshik ıeleriniń ózderiniń qatysýyn, onyń ishinde jergilikti atqarýshy organdardyń turǵyn úı ınspektsııasyn tartýǵa baǵyttalǵan.
Sonymen qatar, depýtattardyń talqylaýyna «Bir taraptan Eýrazııalyq ekonomıkalyq odaq pen oǵan múshe memleketter jáne ekinshi taraptan Qytaı Halyq Respýblıkasy arasyndaǵy saýda-ekonomıkalyq yntymaqtastyq týraly kelisimdi ratıfıkatsııalaý týraly» zań jobasy usynylady.
Kelisim QHR-men anaǵurlym tyǵyz saýda-ekonomıkalyq áriptestikke birtindep jyljý úshin negiz bolýǵa tıis. Kelisim aqparat almasýdy damytý, kedergilerdi anyqtaý jáne Qytaımen ózara saýdany ilgeriletý quraly bolýǵa arnalǵan, sondaı-aq qosymsha áleýetti yntymaqtastyq salalaryn izdeýge yqpal etetin bolady.
