Májilis spıkeri : Memlekettik qyzmetter - bul qoǵam ómirine naqty yqpal etetin sala
ASTANA. 6 naýryz. QazAqparat - Memlekettik qyzmetter - qoǵam ómirine naqty yqpal etetin sala. Sondyqtan da bul zań jobasynyń elimiz úshin mańyzy zor.
Búgin QR Parlamenti Májilisiniń jalpy otyrysynda «Memlekettik qyzmetter kórsetý týraly» zań jobasyn ekinshi oqylymda maquldaý barysynda palata Tóraǵasy Nurlan Nyǵmatýlın osylaı málim etti.
Qujattyń qoǵam ómirindegi mańyzdylyǵyna nazar aýdarǵan Májilis Tóraǵasy, jalpy memlekettik qyzmetterdiń qoǵam ómirine yqpal etetin sala ekendigin aıtty. «Sondyqtan da bul zań jobasynyń qoǵam ómiri úshin mańyzy zor. Ol memleket tarapynan kórsetiletin qyzmetterdiń sanyn arttyryp qana qoımaı, sapasyn kóterýge de múmkindik beredi. Sonymen qatar, bul eń aldymen, áleýmettik bólikte kórinis tabýǵa tıis. Al ol memleket pen qoǵamnyń tıimdi yqpaldastyǵy úshin óte qajetti sharttardyń biri. Elbasymyz óziniń «Qazaqstan - 2050 Strategııasynda» osyǵan erekshe nazar aýdarǵan bolatyn», -dep atap ótti spıker.
Eske salsaq, qujattyń basty maqsaty memlekettik qyzmet kórsetýdi zańdyq turǵydan retteý, memlekettik qyzmet kórsetý tártibin birkelki talaptarmen qamtamasyz etý, memlekettik qyzmet salasynda memlekettik organdar ókilettigin naqty aıqyndaý, memlekettik qyzmet kórsetý, sonyń ishinde elektrondyq túrdegi rásimderdi jetildirý bolyp tabylady.
