Májilis spıkeri Qazaqstanda veterınarlyq zańnamany buzǵandarǵa jaýapkershilikti kúsheıtýdi usyndy
Búgin «Qazaqstan Respýblıkasynda mal sharýashylyǵyn damytýdyń ózekti máseleleri men perspektıvalary» atty taqyrypta ótken Parlamenttik tyńdaýda sóz sóılegen Májilis spıkeri Nurlan Nyǵmatýlın osylaı málimdedi.
Spıker sóz arasynda elimizdegi mal basynyń 80 paıyzy jeke sharýashylyq ıeliginde ekenine nazar aýdartyp, buǵan baılanysty atalǵan máselelerdi sheshý úshin maqsatty jumystardy qolǵa alý kerektigin tilge tıek etti.
«Máselen, mindetti túrde veterınarııa mamandaryn, sonyń ishinde otandyq jáne sheteldik sarapshylardy qatystyra otyryp, shetelden asyl tuqymdy mal bastaryn jetkizý qajet. Sonymen qatar, búgingi kúni elimizdiń aýmaqtarynda veterınarlyq jaǵdaıy da syn kótermeı otyr. Bul máseleni sheshýdiń negizgi joly - veterınarııa júıesin ınstıtýtsıonaldyq nyǵaıtý, sondaı-aq aýrý malmen kúresýdiń qysqa, orta jáne uzaq merzimdi strategııasyn qabyldaý bolyp tabylady. Budan bólek, maldyń asa qaýipti juqpaly aýrýlarynyń aldyn alý jumystary boıynsha memlekettik monopolııa engizý múmkindikterin qarastyrýymyz qajet. Ol úshin veterınarlyq-sanıtarlyq qaýipsizdik máselelerin tıimdi sheshýge yqpal etetin myqty veterınarlyq baqylaý bolý kerek. Sondyqtan, Parlament depýtattary «Veterınarııa týraly» Zańǵa veterınarııa zańnamasyn saqtamaǵan jáne buzǵan laýazymdy, zańdy, jeke tulǵalardyń jaýapkershiligin kúsheıtýge baǵyttalǵan bólimine naqty usynystar engizetin bolady», - dep atap ótti Nurlan Nyǵmatýlın.
