Májilis sot júıesin jańǵyrtý týraly zań jobasyn qarap jatyr
ASTANA. QazAqparat - QR Parlamentiniń Májilisi «Qazaqstan Respýblıkasynyń sot júıesi men sýdıalarynyń mártebesi týraly» Qazaqstan Respýblıkasy Konstıtýtsııalyq zańyna ózgerister men tolyqtyrýlar engizý týraly» Qazaqstan Respýblıkasy Konstıtýtsııalyq zańynyń jobasy boıynsha jumysty bastady, dep habarlaıdy QazAqparat.
«Atalǵan Konstıtýtsııalyq zań jobasy Memleket basshysynyń zań shyǵarý bastamasy tártibinde Parlament Májilisine engizildi. Bul zań jobasy elimizdiń sot júıesin jańǵyrtýǵa baǵyttalǵan birqatar ózgerister men tolyqtyrýlardy kózdeıdi. Sonyń ishinde aýdandyq sottarǵa júktemeni turaqtandyrý, sot tóreliginiń konstıtýtsııalyq táýelsizdik kepildikterin iske asyrý maqsatynda túzetýler qarastyrylǵan. Komıtet bul zań jobasyn jumysqa alýǵa daıyn», - dedi Májilistiń Zańnama jáne sot-quqyqtyq reforma komıtetiniń tóraǵasy Nurlan Ábdirov palatanyń jalpy otyrysynda.
Sonymen qatar, Májilis «Qazaqstan Respýblıkasynyń keıbir zańnamalyq aktilerine sot júıesin jańǵyrtý máseleleri boıynsha ózgerister men tolyqtyrýlar engizý týraly» zań jobasy boıynsha jumysty bastady. Osy qujat ta Memleket basshysynyń zań shyǵarý bastamasy tártibinde Parlament Májilisine engizildi.
Budan buryn habarlanǵandaı, Prezıdent Májilistiń qaraýyna sot júıesin jańǵyrtýǵa baǵyttalǵan zań jobalaryn engizdi.
Zań jobalary Qazaqstan Respýblıkasy Prezıdentiniń 2018 jylǵy 5 qazandaǵy Qazaqstan halqyna arnalǵan Joldaýyn iske asyrýǵa, sot júıesin jańǵyrtýǵa, sot kadrlaryn jańartýǵa jáne Joǵary Sot Keńesin ınstıtýtsıonaldyq turǵydan nyǵaıtýǵa baǵyttalǵan túzetýlerdi qamtıdy.
