Májilis soǵys ardagerlerine áleýmettik qoldaý kórsetýdi kózdeıtin zań jobasyn qarap jatyr
NUR-SULTAN. QazAqparat – Búgin Parlament Májilisiniń jalpy otyrysynda palata depýtattary «Ardagerler týraly» zań jobasyn jumysqa aldy. Endi Májilis komıteti atalǵan qujat boıynsha talqylaýdy júrgizedi, dep habarlaıdy QazAqparat tilshisi.
«Atalǵan zań jobasy Otan aldyndaǵy áskerı ári azamattyq boryshyn atqarǵan Qazaqstan ardagerleri men azamattarynyń quqyqtary men áleýmettik múddelerin qorǵaý salasyndaǵy máselelerdi retteýge baǵyttalǵan. Osy zań jobasy ardagerlerdiń 5 áleýmettik qorǵalatyn sanaty mártebesin belgileýdi kózdeıdi», - dedi Májilistiń Áleýmettik-mádenı damý komıtetiniń tóraıymy Gúlshara Ábdiqalyqova.
Onyń sózine qaraǵanda, zań jobasynda UOS ardagerleriniń jáne jeńildikter men kepildikter boıynsha soǵys ardagerlerine teńestirilgen tulǵalardyń mártebesin belgileý usynylady.
«Sonymen qatar, basqa memleketterdiń aýmaǵynda jaýyngerlik qımyldar atqarǵan ardagerlerdi, Qazaqstan Respýblıkasynyń beıbitshilik pen qaýipsizdikti saqtaý jónindegi halyqaralyq mindettemelerin oryndaǵan áskerı qyzmetshilerdi olarǵa jatqyza otyryp, jeke sanatyna bólý usynylady. Zań jobasynda ardagerler úshin áleýmettik qoldaýdyń birqatar sharalaryn belgileý qarastyrylady. Komıtet zań jobasyn jumysqa alýǵa ári ol boıynsha qorytyndyny 2020 jyldyń 24 maýsymyna deıin usynýǵa daıyn»,- dedi depýtat.
Munymen qosa, jalpy otyrysta «Qazaqstan Respýblıkasynyń keıbir zańnamalyq aktilerine áleýmettik qamsyzdandyrý máseleleri boıynsha ózgerister men tolyqtyrýlar engizý týraly» ilespe zań jobasy da jumysqa alyndy.
«Atalǵan zań jobasy «Ardagerler týraly» zań jobasyna sáıkes keltirý maqsatynda qoldanystaǵy zańnamaǵa ózgerister men tolyqtyrýlar engizýdi kózdeıdi. Zań jobasynda ardagerler úshin birqatar áleýmettik quqyqtyq kepildik belgileý qarastyrylǵan.
Osylaısha, qujatta Sotsıalıstik Eńbek Erlerine jáne úshinshi dárejeli Eńbek Dańqy ordenderiniń ıegerlerine 138,6 AEK–ke deıin arnaýly memlekettik járdemaqy mólsherin arttyrý kózdelgen. Sondaı-aq basqa memleketterdiń aýmaǵynda soǵys qımyldarynyń ardagerlerine 6,19 AEK mólsherinde arnaýly memlekettik járdemaqy belgileý usynylady», - dedi Gúlshara Ábdiqalyqova.
