Májilis shıfrlyq baılanys máselelerin qamtıtyn zań jobasyn maquldady
ASTANA. 22 aqpan. QazAqparat - Búgin QR Parlamenti Májilisiniń jalpy otyrysynda palata depýtattary «Qazaqstan Respýblıkasynyń keıbir zańnamalyq aktilerine shıfrlyq baılanys máseleleri boıynsha ózgerister men tolyqtyrýlar engizý týraly» zań jobasyn maquldady.
Zań jobasynyń maqsaty shıfrlaý quraldary týraly málimetterdi memlekettik qupııalarǵa jatqyzý, shıfrlaý jumysyn uıymdastyrý, úkimettik baılanysty qamtamasyz etý tártibin, sondaı-aq olardy bekitý tártibin aıqyndaý bolyp tabylady. Budan bólek, qujatta shıfrlaý jumysy, shıfrlanǵan, qupııalandyrylǵan jáne kodtalǵan baılanys sekildi uǵymdardy anyqtaý sharalary kózdeledi.
«Zań jobasy qabyldansa shıfrlaý jumysyn qamtamasyz etý, uıymdastyrýǵa baılanysty qoldanystaǵy keıbir zańnamalyq olqylyqtar joıylatyn bolady. Osy maqsatta baılanys jáne memlekettik qupııalar týraly zańdarǵa túzetý engiziletin bolady. Atap aıtqanda, shıfrlaý jumysyna Ulttyq qaýipsizdik komıteti men ishki ister organdarynyń uıymdastyrý jáne tehnıkalyq sharalar kesheni kiretin bolady. Bul rette shıfrlanǵan baılanys degenimiz qol shıfrlaryn, shıfrlaý mashınalaryn, apparatýralar men esepteý tehnıkalyq quraldary arqyly qorǵalǵan baılanysty bildiredi. Qupııalanǵan baılanys - qupııalaý apparatýralary arqyly qupııalanǵan baılanysty, al kodtalǵan baılanys kodtaý qujattary men tehnıkalary arqyly beriletin baılanystardy ańǵartady», - deıdi zań jobasy boıynsha baıandaǵan UQK tóraǵasynyń orynbasary Ǵusman Ámrın.
Onyń aıtýynsha, zań jobasynda shıfrlaý quraldary memlekettik qupııaǵa jatqyzylatyn bolady.
Májilis maquldaǵan zań jobasy Parlament Senatyna jiberiledi.
