Májilis Serbııamen arada saýdany damytýǵa arnalǵan qujatty maquldady
NUR-SULTAN. QazAqparat – Parlament Májilisiniń jalpy otyrysynda «Bir taraptan Eýrazııalyq ekonomıkalyq odaq pen oǵan múshe memleketter jáne ekinshi taraptan Serbııa arasyndaǵy erkin saýda týraly kelisimdi ratıfıkatsııalaý týraly» zań jobasy maquldandy, dep habarlaıdy QazAqparat tilshisi.
Osy Kelisim kedendik ákelý bajdaryn alyp tastaý jáne birqatar taýardy bajsyz ákelýge kvota berý arqyly Eýrazııalyq ekonomıkalyq odaqqa múshe memleketter men Serbııa Respýblıkasy arasyndaǵy ózara saýdany jaqsartý úshin jaǵdaı jasaýǵa baǵyttalǵan.
«Qazirdiń ózinde Qazaqstan, Belarýs jáne Reseıde Serbııa Respýblıkasymen erkin saýda týraly ekijaqty sharttar qoldanylýda. Eýrazııalyq ekonomıkalyq odaqqa Armenııa men Qyrǵyzstannyń qosylýyna baılanysty 2015 jyly barlyq bes memleketke biryńǵaı saýda rejımin ornatý qajettiligi týyndady», - dep túsindirdi Saýda jáne ıntegratsııa mınıstri Baqyt Sultanov.
Onyń aıtýynsha, jańa kelisimde eki jaqty bajsyz saýdamen qarastyrylǵan taýarlar tizbesi ulǵaıady. Osylaısha, Eýrazııalyq ekonomıkalyq odaq elderi Serbııaǵa irimshik, alkogoldik ishimdikter jáne temeki taýarlaryn bajsyz jetkize alady. Burynda bul taýarlarǵa ımporttyq baj salyqtary salynǵan.
«Eýrazııalyq ekonomıkalyq odaq elderi de serbııalyq irimshikke, temekige, brendıge ishki naryqqa qol jetkizý sharttaryn jaqsartty.
Sonymen qatar, ishki naryqty qorǵaý maqsatynda Eýrazııalyq ekonomıkalyq odaq qus etin, qantty, matalardy, alkogoldi ishimdikterdi, temekini ákelýge, sondaı-aq kompressorlar men motorly kólik quraldary sııaqty birqatar ónerkásiptik taýarlarǵa ımporttyq baj salyǵyn qoldanýdy saqtaıdy. Aıtyp ótetin taǵy da bir jaıt jańa Kelisimniń artyqshylyqtarynyń biri – ony Dúnıejúzilik Saýda Uıymynyń negizgi normalarymen tolyqtyrýǵa qatysty. Atap aıtqanda, kelisimniń taraptary sanıtarııalyq jáne fıtosanıtarııalyq sharalardy, tehnıkalyq retteý sharalaryn qoldaný jolymen ózara saýdada artyq kedergiler jasamaıtyn bolady jáne zııatkerlik menshik obektilerin qorǵaýǵa kepildik beretin bolady», - dedi mınıstr.
Kelisim taraptary ózara saýdada ulttyq rejım jáne barynsha qolaıly rejım sııaqty Dúnıejúzilik Saýda Uıymynyń negizgi qaǵıdattaryn qoldanýǵa mindettenedi. Osy Kelisimdi iske asyrý Eýrazııalyq ekonomıkalyq odaqqa múshe memleketterde óndiriletin taýarlardy ótkizý naryǵyn keńeıtýge múmkindik beredi. Atap aıtqanda, qazaqstandyq taýarlardyń Serbııaǵa eksportyn ulǵaıtý áleýeti 250 mln AQSh dollaryn quraıdy. Osy oraıda munaı-hımııa, hımııa, mashına jasaý, metallýrgııa, qurylys jáne azyq-túlik taýarlary sııaqty salalar eskerilgen.
