Májilis saılaýyna baqylaý jasaıtyn taǵy 7 sheteldik baıqaýshy tirkeldi

ASTANA. QazAqparat – Búgin Ortalyq saılaý komıssııasy 19 naýryzda ótetin kezekten tys Májilis saılaýyna taǵy 7 sheteldik baıqaýshyny akkredıttedi, dep habarlaıdy QazAqparat tilshisi.

«Halyqaralyq baıqaý ınstıtýty ashylǵannan beri 6 shet memleketten, 3 halyqaralyq uıymnan 72 baıqaýshy resmı tirkeýden ótti. Búgingi tańda Syrtqy ister mınıstrligi 3 shet memleketten 7 baıqaýshyny tirkeýden ótkizýdi usyndy. Atap aıtsaq, Ortalyq saılaý komıssııasynyń shaqyrýy boıynsha Armenııa Respýblıkasynan 2 jáne Grýzııadan 2 baıqaýshy – atalǵan memleketterdiń ortalyq saılaý komıssııasy músheleri men ókilderi. Sondaı-aq, Frantsııa Respýblıkasynan 3 kandıdatýra, onyń ishinde qurmetti Elshi myrza men dıplomattar tirkeýge usynyldy», - dedi Ortalyq saılaý komıssııasynyń hatshysy Muhtar Erman komıssııa otyrysynda.

Osydan keıin Ortalyq saılaý komıssııasy usynylǵan baıqaýshylardy tirkeý jóninde qaýly qabyldady.