Májilis saılaýy: Taǵy 37 sheteldik baıqaýshy akkredıtteldi

ASTANA. QazAqparat – Búgin Ortalyq saılaý komıssııasy19 naýryzda ótetin kezekten tys Májilis saılaýyna taǵy 37 sheteldik baıqaýshyny akkredıttedi, dep habarlaıdy QazAqparat tilshisi.

«2023 jylǵy 20 qańtarda halyqaralyq baıqaý ınstıtýty ashylǵannan beri Ortalyq saılaý komıssııasy 1 shet memleketten, 2 halyqaralyq uıymnan 25 baıqaýshyny resmı tirkeýden ótkizdi. 2023 jylǵy 9 aqpandaǵy jaǵdaı boıynsha komıssııaǵa Syrtqy ister mınıstrliginen 2 shet memleketten, 1 halyqaralyq uıymnan 37 baıqaýshyny tirkeýden ótkizýdi usyndy», - dedi Ortalyq saılaý komıssııasynyń hatshysy Muhtar Erman komıssııa otyrysynda.

Onyń naqtylaýynsha, Qytaı Halyq Respýblıkasynan 2 jáne Nıderlandy Koroldiginen 3 baıqaýshy usynylǵan.

«Sonymen qatar Demokratııalyq ınstıtýttar jáne adam quqyqtary jónindegi bıýrosynyń saılaýdy baıqaý jónindegi mıssııasynan 32 baıqaýshy usynyldy», - dedi ol.

Osydan keıin Ortalyq saılaý komıssııasy usynylǵan baıqaýshylardy tirkeý týraly qaýly qabyldady.