Májilis saılaýy: Saıası partııalar ókilderi arasyndaǵy pikirsaıys bastaldy

ASTANA. QazAqparat – Parlament Májilisi saılaýyna qatysatyn 7 saıası partııa ókilderi arasynda pikirsaıys bastaldy. Pikirsaıys «Habar» telearnasynyń tikeleı efırinde kórsetilip jatyr, dep habarlaıdy QazAqparat tilshisi.

Pikirsaıysqa «Amanat» saıası partııasynan Erlan Qoshanov, «Aýyl» halyqtyq demokratııalyq patrıottyq partııasynan Jıgýlı Daırabaev, «Respublica» partııasynan Aıdarbek Qojanazarov, «Qazaqstan halyq partııasynan» Oksana Áýbákirova, Qazaqstannyń «Baıtaq» jasyldar partııasynan Azamathan Ámirtaev, «Aq jol» Qazaqstan demokratııalyq partııasynan Azat Perýashev, al «Jalpyulttyq sotsıal-demokratııalyq partııasynan» Nurlan Áýesbaev túsip jatyr.

Televızııalyq pikirsaıys reglament boıynsha úsh raýndtan turady. Birinshi raýndtyń ózi eki týrǵa bólingen. Alǵashqysynda qatysýshylar óz partııalaryn tanystyrady. Atap aıtqanda, partııanyń maqsat-muraty, saıası keńistiktegi orny men halyqtyń turmys-tirshiligin qalaı jaqsartatyny týraly málimet beredi. 2 mınýtta tanystyryp úlgerýleri tıis. Birinshi raýndtyń ekinshi týrynda qatysýshylar qarsylastaryna ótkir, ózekti suraq qoıa alady.

Ekinshi raýnd «Qazaqstannyń áleýmettik-ekonomıkalyq damýy» dep atalady. Ol da eki týrǵa bólingen. Birinshi týrda qatysýshylar ózderiniń saılaýaldy baǵdarlamalary aıasynda Qazaqstandy áleýmettik-ekonomıkalyq jaǵynan qalaı damytatyny týraly aıtady. Oǵan da 2 mınýt ýaqyt beriledi. Al, ekinshi týrynda partııa ókilderi «Habar» agenttigi arnaıy uıymdastyrǵan Call ortalyqqa kórermennen kelip túsken bir suraqqa jaýap beredi.

Úshinshi raýndta teledebat qatysýshylary «Saılaýshylarǵa úndeý» jasaıdy. Ár qatysýshyǵa 1,5 mınýttan ýaqyt beriledi.

Aıta keterligi, buǵan deıin 7 saıası partııa ókilderiniń arasyndaǵy birinshi pikirsaıys Qazaqstan ulttyq telearnasynyń efırinde ótken bolatyn.

Al, ekinshi pikirsaıys KTK telearnasynda uıymdastyrylǵan edi.