Májilis saılaýy: Partııalardyń saıası naýqanǵa daıyndyǵy qandaı
Burynǵy kommýnıster birinshi bolyp quryltaı ótkizdi
30 qańtarda elordada Qazaqstan halyq partııasynyń kezekten tys HHІІІ sezi ótti. Sezd barysynda partııa tóraǵasy Ermuhamet Ertisbaev delegattarǵa saılaýaldy baǵdarlamasyn bekitýdi usynyp, ol biraýyzdan qoldaý tapty.
Foto: qhp.kz
«Búgin biz, Halyq partııasy, saıası partııalardyń ishinde saılaý aldyndaǵy sezdi birinshi bolyp ótkizip otyrmyz. Birinshi bolýdyń jaýapkershiligi – úlken, júgi – aýyr. Al birinshi bolý – bizdiń saıası alańdaǵy vızıttik kartochkamyz bolyp ketti. Barshańyzǵa belgili, byltyr Halyq partııasy Memleket basshysynyń Prezıdent jáne Parlament saılaýy týraly bastamasyn birinshi bolyp qoldady. Saılaýda Qasym-Jomart Toqaevtyń kandıdatýrasyn qoldaýǵa halyq koalıtsııasyn qurýdy birinshi bolyp halyq partııasy usyndy», - dedi sezde sóz sóılegen partııa tóraǵasy Ermuhamet Ertisbaev.
Foto:halykpartiyasy.kz
Onyń atap ótýinshe, partııa áliptiń artyn baǵý baǵytyn ustanbaıdy ári tabandy kúreske daıyn.
Sonymen qatar Qazaqstan halyq partııasy 19 naýryzda ótetin kezekten tys Májilis saılaýyna kandıdattar tizimin bekitti.
«Bastapqyda tizimde 120-dan astam adam bolǵan edi. Biz oryndy shynaıy bólý qajettigin eskere otyryp, tizimdi qysqarttyq. Qazaqstan halyq partııasy Parlament Májilisi depýtattaryn saılaýǵa 52 adam usynady», - dedi partııa tóraǵasy Ermuhamet Ertisbaev sezd barysynda.
Onyń atap ótýinshe, partııalyq tizimde alty ulttyń ókili bar. Kandıdattardyń ortasha jasy 50 jas. Sonymen qatar tizimdegi áıelder, jastar jáne múgedek jandardvń úlesi 32,6 paıyzdy quraıdy.
1 aqpanda Qazaqstan halyq partııasy Ortalyq saılaý komıssııasyna kandıdattar qujatyn tapsyrdy.
Qujattar tiziminde partııanyń joǵary organynyń hattamasynan úzindi, QR Ádilet mınıstrliginde saıası partııany tirkeý týraly qujattyń kóshirmesi, partııalyq tizim, azamattardyń partııalyq tizimge enýge kelisimi týraly ótinishi jáne ómirbaıandary, múgedektigi bar kandıdattardyń anyqtamalary bar.
«Bir maqsatymyz ǵana bar – tek qana jeńiske jetý kerek. Búgin halyq partııasynan kandıdattar tizimin tapsyryp shyqtym. Onda 52 kandıdattan quralǵan tizim bar. Ózderińiz bilesizder, dúısenbi kúni bizdiń halyq partııasynyń sezin ótkizdik, men baıandama jasadym, sonda bárin aıttym. Qazir esh alyp-qosarym joq. Saılaý týraly zańǵa sáıkes, ázirge eshqandaı aqparat jarııalaı almaımyz. Ortalyq saılaý komıssııasy eshqandaı úgit-nasıhat júrgizýge tyıym salynǵanyn eskertti», - dedi E. Ertisbaev tilshilerge bergen suhbatynda.
Saıası arenada - jańa partııa
«Baıtaq» jańa saıası partııasynyń saılaýaldy sezi 3 aqpanda ótti. Sezde partııanyń saılaýaldy tuǵyrnamasy talqylanyp, daýysqa salyndy. Atalǵan sharaǵa elimizdiń barlyq óńirlerinen delegattar qatysty.
Partııadan tizim boıynsha 20 kandıdat usynyldy, onyń ishinde áıelder kvotasy boıynsha 4 kandıdat, jastar kvotasy boıynsha – 1 kandıdat jáne múgedekter kvotasy boıynsha – 1 kandıdat bar.
Odan bólek, taǵy 4 kandıdat majorıtarlyq júıe boıynsha saılaýǵa qatysady.
Olar – partııa tóraǵasy Azamathan Ámirtaev, Baqyt Isaev, Gúlzaǵıra Ábdiraıymova jáne Serikbolat Májenov.
Osylaısha «Baıtaq» partııasy atynan Májilis saılaýynda 24 kandıdat baǵyn synaıdy.
Aıta ketsek, otandyq ekolog-ǵalym, qoǵam qaıratkeri Aıjan Sqaqova «Baıtaq» partııasynyń qataryna qosylǵan edi.
Foto:baytaq.kz
«Baıtaq» pen Respublica búkil óńirlerde máslıhat depýtattaryn saılaýǵa qatysady. Mundaı sheshim Ortalyq saılaý komıssııasynyń otyrysynda qabyldandy.
Al Respublica partııasynyń sezi 6 aqpanǵa belgilenip otyr.
«Aqjoldyqtardyń» saılaýaldy baǵdarlamasy áli daıyn emes
«Aq jol» partııasy saılaýaldy baǵdarlamany qabyldaýdy keıinge qaldyrdy
Atalǵan demokratııalyq partııanyń kezekten tys HHІ sezinde Májilis depýtattyǵyna kandıdattar tizimi bekitildi.
«Bıylǵy Májilis jáne máslıhattar saılaýy erekshe ótedi. Memleket basshysy bul saılaýdyń bolatynyn jarty jyl buryn jarııalady. Sondyqtan búkil saıası kúshterge, partııalarǵa, onyń ishinde bizdiń partııamyzǵa daıyndalýǵa tolyq múmkindik berildi», - dedi «Aq jol» demokratııalyq partııasynyń HHІ quryltaıynda saıası uıym basshysy Azat Perýashev.
Quryltaı barysynda Májilis saılaýyna partııalyq tizim arqyly 54, al majorıtarlyq júıe arqyly 24 adam kandıdat retinde bekitildi.
Sonymen qatar barlyq deńgeıdegi jergilikti máslıhattar depýtattaryn saılaýǵa «Aq jol» partııasynyń atynan 174, al majorıtarlyq júıemen 652 usynylatyn boldy.
Saılaýaldy baǵdarlamany qabyldaýdy keıinge qaldyrý sebebin partııa tóraǵasy tolyqtyrý qajet ekenimen túsindirdi.
«Osy komıssııa daıyndaǵan jobany tolyqtyryp, quryltaıymyzdyń atynan qarastyrýdy jáne qabyldaýdy Ulttyq keńesimizge tapsyraıyq degen usynys bar», - dedi Azat Perýashev.
JSDP saılaýǵa 25 úmitker usyndy
Jalpyulttyq sotsıal-demokratııalyq partııa Májilis saılaýyna 25 kandıdat usynady
Partııanyń kezekten tys sezinde delegattar osyndaı sheshim qabyldady.
Sonymen Jalpyulttyq sotsıal-demokratııalyq partııa 19 naýryzda ótetin kezekten tys Májilis saılaýyna 25 kandıdat usynady. Onyń 19-y partııa tizimimen, altaýy majorıtarlyq ádispen usynylyp otyr.
«Búgin óte mańyzdy sez ótip jatyr. Qazaqstanda mańyzdy ózgerister bolyp jatyr. Halyq úshin osynshama mańyzdy kezeńde eldegi jalǵyz oppozıtsııalyq partııa retinde bul ózgeristerden tys qala almaımyz», - degen partııa tóraǵasy Ashat Rahymjanov Májilis saılaýyna usynylatyn kandıdattar tizimi biraýyzdan bekitilgenin málim etti.
«Aýyl» partııasy qatarynda jańa adamdar júr
Kúni keshe elordada «Aýyl» partııasynyń kezekten tys sezi ótti. Sezd qorytyndysy boıynsha partııa atynan 34 kandıdat Májilis jáne máslıhat saılaýyna túsetini belgili boldy.
Aldaǵy saılaýda «Aýyl» partııasy atynan 25, al bir mandatty júıe boıynsha 9 kandıdat baq synaıdy.
Sondaı-aq, sezd barysynda prezıdenttikke kandıdat bolǵan Qaraqat Ábden «Aýyl» partııasyna ótkeni belgili boldy.
«Qaraqat Ábden bizdiń qatarymyzǵa qosyldy. Baıqasańyzdar, prezıdent saılaýynda Qaraqat Ábdenniń tujyrymdamasy halyqtyq dástúrlermen, aýyldyq baǵyttaǵy dástúrlermen baılanysty boldy. Sondyqtan onyń dástúrleri bar, dástúrdi, mádenıetti, adamı kapıtaldy, shyǵarmashylyqty damytý – biz ustanǵan negizgi baǵyttardyń biri. Sondyqtan Qaraqatty qatarymyzǵa qýana qabyldadyq. Tolyq partııalyq tizimdi usyný jáne qabyldaýdy búgingi sezd sheshedi»,- dedi «Aýyl» partııasynyń tóraǵasy Álı Bektaev sezd aldynda BAQ ókilderiniń saýalyna jaýap bere otyryp.
Partııalar qalaı qarjylandyrylady?
QR Premer-Mınıstriniń orynbasary – Qarjy mınıstri Erulan Jamaýbaev Parlamentke engen partııalarǵa qarastyrylǵan qarajatqa túsinik berdi.
«Jaqyn arada 2023 jylǵa arnalǵan bıýdjetti naqtylaý boıynsha Parlamentke baramyz. Bul turǵyda Ortalyq saılaý komıssııasynyń derekteri aıasynda osy bıýdjetti qaıta qarap, partııalar arasynda bólemiz. Zań boıynsha bul qarajatty Parlamentke fraktsııa bolyp engen partııalar alady», - dedi E. Jamaýbaev.
«Máselen, 2022 jyly shamamen 8,5 mlrd teńge qarastyrylǵan edi. Onyń basym bóligi Amanat partııasyna, 1 mlrd teńgege jýyǵy Aq jolǵa, sondaı-aq 800 mln teńge Qazaqstan halyq partııasyna bólindi», - deıdi qarjy mınıstri.
Ortalyq saılaý komıssııasy sheteldik baıqaýshylardy tirkeı bastady
2 aqpanda OSK Májilis saılaýyna 25 sheteldik baıqaýshyny akkredıttedi.
«Ortalyq saılaý komıssııasyna Syrtqy ister mınıstrliginen bir shet memleketten, 2 halyqaralyq uıymnan 25 baıqaýshyny akkredıtteý usynyldy. Onyń ishinde Palestına memleketinen – 1, TMD-ǵa qatysýshy memleketterdiń Parlamentaralyq assambleıasynan – 11, EQYU Demokratııalyq ınstıtýttar jáne adam quqyqtary jónindegi bıýrosynan – 13 baıqaýshy. Akkredıtatsııadan ótkizý úshin kelip túsýine qaraı baıqaýshylar jónindegi derekter jańaryp otyratyn bolady», - dedi OSK hatshysy Muhtar Erman.
Tórt top partııa qurý úshin qujat tapsyrdy.Ádilet mınıstrliginiń málimetinshe, elimizde taǵy 4 bastamashyl top partııa qurýǵa nıetti.
Qazaqstandyqtar Májilisten qandaı partııalardy kórgisi keledi
Qoǵamdyq saýalnama nátıjesi kórsetkendeı, kezekten tys Parlament saılaýynda daýys berýge nıettilerdiń 48,6% AMANAT partııasyn qoldaýǵa bel býyp otyr.
«Aýyl» partııasyn qoldaıtyndar – 6,2%, al «Aqjol» úshin halyqtyń 5,4% daýys bermek.
Basqa partııalar boıynsha saýalnama qorytyndysy:
Qazaqstan halyq partııasy – 4,8%, Respublica – 3,6%, Jalpyulttyq sotsıal-demokratııalyq partııasy – 3,2% jáne «Baıtaq» 2,8%.
Respondentterdiń 2,6% «barlyǵyna qarsymyn» baǵanyn belgilemek.
Saılaýshylardyń jartysynan kóbi daýys berýge daıyn
Atalǵan boljam qoǵamdyq saýalnama nátıjesinde anyqtalyp otyr.
Saýalnama qorytyndysy boıynsha Májilis saılaýyna baratyndardyń yqtımal kórsetkishi - 53,3 paıyz.
