Májilis saılaýy: Nur Otan partııalyq tizimine kimder endi

NUR-SULTAN. QazAqparat - Aqmola, Atyraý, Jambyl, Mańǵystaý, Pavlodar jáne Soltústik Qazaqstan oblystarynda Nur Otan-nyń Májiliske arnalǵan partııalyq tizimine 21 úmitker anyqtaldy. Partııanyń baspasóz qyzmeti taratqan aqparatqa sáıkes, aımaqtyq saılaýaldy baǵdarlamalary bekitilip, «Nur Otan» XX Sezine qatysý úshin delegattar saılandy, dep habarlaıdy QazAqparat.

Sonymen, daýys berý qorytyndysy boıynsha Jambyl oblysynda tizimge Moıynqum aýdandyq partııa fılıalynyń tóraǵasy Máden Musaev, aýmaqtyq kásipodaqtar birlestiginiń ókili Meırambek Tólepbergen, densaýlyq saqtaý salasynyń ókilderi Gúldara Nurymova men Gýlam Omarov, sondaı-aq mektep dırektory Sultan Óserbaev endi.

Aqmola oblysynda pikirsaıys qorytyndysyna sáıkes eń kóp daýysty Sandyqtaý aýdanynda turatyn partııa múshesi Asqarbek Úısimbaev jınady. Odan 22 daýys kem jınaǵan kásipker Pavel Bezverbnyı ekinshi orynǵa shyqty. Úzdik úshtikke bilim salasynyń ókili Mádı Elýbaev ta kirdi.

Pavlodar oblysynda 4 oryn úshin 16 úmitker baq synady. Pikirsaıys qorytyndysy boıynsha jeke sektor ókilderi Anatolıı Boıchın men Gúlnar Qaıdarova, sondaı-aq partııanyń aýdandyq fılıaldarynyń ókilderi Janat Shuǵaev pen Danııar Aıtyshev jeńimpaz atandy.

Soltústik Qazaqstan oblysynda birinshi oryndy kásipker Gennadıı Zenchenko ıelendi. Odan keıingi orynǵa «Soltústik» ÁKK basshysy Esjan Orazalın jaıǵasty. Úshinshi orynda – jeke sektor ókili Dmıtrıı Koloda.

Atyraý oblysynda debatqa 10 úmitker qatysyp, olardyń arasynan partııalyqtar úsheýin tańdady. Atap aıtqanda, jeke sektor ókilderi Dúısenbaı Turǵanov pen Sálimjan Naqpaev jáne aýdandyq máslıhat hatshysy Tolqyn Beısqalı.

Al Mańǵystaý oblysynda eń kóp daýys jınaǵan kásipkerlik salasynyń ókilderi Samat Musabaev, Edil Jańbyrshın jáne Ospan Qazaqbaev boldy.

Aıta keteıik, buǵan deıin Májilistiń partııalyq tizimine elorda, Almaty, Shymkent qalalary men 8 oblystan kandıdattar saılanǵan bolatyn.

Qorytyndy tizim 25 qarashada partııanyń XX Sezinde bekitiledi.

Barlyq deńgeıdegi 216 máslıhatqa 6253 adamnan turatyn partııalyq tizim jasalyp úlgerdi.

Áıelderdiń úles sany 22-den 34%-ke deıin, jastar – 3,5 ese, 7-den 24%-ke deıin artty. Qazirgi qyzmet etip otyrǵan máslıhattardyń quramymen salystyrǵanda ortasha jasy 7 jasqa – 51-den 44-ke deıin jasardy.

Partııalyq tizimderdiń 24%-in qyzmettegi depýtattar quraıdy, al 76%-i – jańa tulǵalar. Sonymen qatar partııa qataryna 42 myńnan astam jańa múshe qosyldy. Olardyń 1000-nan astamy partııaishilik saılaýǵa qatysyp, árbir 3-shisi «Nur Otan»-nyń partııalyq tizimine endi.

Elektrondy daýys berýdiń nátıjelerin jáne kandıdattar tizimin primaries.kz. saıtynan qaraýǵa bolady.