Májilis saılaýy: Qytaıdaǵy qazaqstandyqtar úsh saılaý ýchaskesinde daýys bere alady

ASTANA. QazAqparat - Qazaqstannyń Qytaıdaǵy elshisi qytaılyq BAQ-ty aldaǵy QR Parlamenti Májilisi saılaýynyń erekshelikteri týraly aqparattandyrdy. Bul týraly Qazaqstannyń Qytaıdaǵy elshiliginen habarlandy.

QR Parlamenti Májilisi jáne máslıhattar depýtattarynyń kezekten tys saılaýy qarsańynda Qazaqstannyń Qytaıdaǵy Elshiligi QHR BAQ úshin úlken baspasóz-brıfıngin uıymdastyrdy.

Іs-shara barysynda Qazaqstannyń Elshisi Shahrat Nuryshev qytaılyq tilshilerdi aǵymdaǵy saılaý naýqanynyń barysymen, QR saılaý júıesiniń erekshelikterimen, sondaı-aq jalpy elimizde júzege asyrylyp jatqan jan-jaqty reformalarmen tanystyrdy.

Óz sózinde Sh.Nuryshev ekijaqty yntymaqtastyqtyń saıası, ekonomıkalyq jáne mádenı-gýmanıtarlyq salalardaǵy aǵymdaǵy jaǵdaıy men odan ári damytý jónindegi josparlary týraly da aıtty.

Baspasóz-brıfıngine «Jenmın Jıbao», «Shina Daily», «Global Times», «South China Morning Post», «Beijing Daily», «Beijing News», «China Youth Daily» gazetteri, «Qytaı», «Foreign Economic Relations & Trade» jýrnaldary, «CGTN» halyqaralyq telearnasy, sondaı-aq «The Paper», «China Online» jáne «Sina Online» jańalyqtar ınternet-portaldary sııaqty BAQ ókilderi qatysty.

Esterińizge sala keteıik, QHR aýmaǵynda turaqty nemese ýaqytsha turatyn jáne 18 jasqa tolǵan Qazaqstan Respýblıkasynyń azamattary 2023 jyl 19 naýryzda QR Parlamenti Májilisi depýtattarynyń saılaýynda Beıjiń ýaqyty boıynsha saǵat 07.00-den 20.00-ge deıin Qazaqstannyń Qytaı aýmaǵyndaǵy dıplomatııalyq jáne konsýldyq mekemeleriniń janynda ornalasqan 3 saılaý ýchaskelerinde (Beıjiń, Shanhaı qq., Gonkong AÁA) daýys bere alady.

Aıta keteıik, osyǵan deıin QR Syrtqy ister mınıstrligi qazaqstandyqtardyń Májilis saılaýyna shetelden de qatysa alatynyn habarlaǵan bolatyn.