Májilis saılaýy: «Baıtaq» partııasy málimdeme jarııalady
«Sonymen byltyr kúzden beri el arasynda aıtylyp júrgen jaıt aqıqatqa aınaldy. Memleket basshysy Toqaevtyń arnaıy sheshimimen Parlamenttiń Májilisi jáne barlyq máslıhat jumysyn toqtatty, ıaǵnı tarady», - dep jazady Azamathan Ámirtaı áleýmettik jelidegi paraqshasynda.
Ol kezekten tys saılaý Jańa Qazaqstan qurý jolyndaǵy saıası reformanyń bir tarmaǵy ekenin aıtady. Sondaı-aq, saılaýǵa túsetindikterin málim etedi.
«Jańa Qazaqstanǵa jańa depýtattarmen, jańa partııalardyń saıasatqa aralasýymen barǵan jón. Durys qadam! Aldaǵy saılaý burynǵylardan ózgerek. Qazirgi jaǵdaıǵa baılanysty, aldaǵy saılaý aralas partııalyq-majorıtarlyq júıe boıynsha ótpek. Sondaı-aq, Qazaqstan halyq assambleıasy Májiliske depýtattar usynbaıdy. Saılaý dodasyna elimizde tirkelgen jeti partııa: «Amanat», «Aq jol», Qazaqstan halyq partııasy, Jalpyulttyq sotsıal-demokratııalyq partııasy, «Aýyl», «Baıtaq» jáne «Respublica» túspek. Osy oraıda, biz baıtaqtyqtarda osy alaman básekede óz baǵymyzdy synap, Parlamentke ótýge tyryspaqpyz. Ras, elimizde ekologııa máselesi aqsap jatyr. Jaǵdaı syn kótermeıdi. Sondyqtan, túıini mol ekologııa máselelerin Parlament minberinen kótermek oıdamyz», - deıdi partııa tóraǵasy.
Aıta ketsek, keshe «AMANAT», «Aq jol» jáne «Qazaqstan halyq partııasy» da úndeý jarııalaǵan bolatyn. «Aýyl» men Jalpyulttyq sotsıal-demokratııalyq partııasy málimdeme jasady.
Eske salsaq, 19 qańtarda Memleket basshysy jetinshi saılanǵan QR Parlamentiniń Májilisin taratý jáne QR Parlamenti Májilisi depýtattarynyń kezekten tys saılaýyn taǵaıyndaý týraly Jarlyqqa qol qoıdy.
Májilis depýtattaryn kezekten tys saılaý 19 naýryzǵa belgilendi.
Sondaı-aq, Memleket basshysy barlyq deńgeıdegi máslıhattardyń ókilettigin toqtatý týraly Jarlyqqa qol qoıdy.
Memleket basshysy Qasym-Jomart Toqaev Parlament Májilisi jáne máslıhat depýtattarynyń kezekten tys saılaýyn taǵaıyndaý týraly málimdeme jasady.
Foto: tabigat-union.kz
