Májilis saıası partııalar týraly qujatta kvotalanatyn sanattardy keńeıtýdi talqylaıdy

NUR-SULTAN. Qazaqparat – Parlament Májilisi «Qazaqstan Respýblıkasyndaǵy saılaý týraly» QR Konstıtýtsııalyq zańyna ózgerister men tolyqtyrýlar engizý týraly» Konstıtýtsııalyq zań jobasyn talqylaıdy, dep habarlaıdy QazAqparat tilshisi.

«Parlament Májilisine atalǵan Konstıtýtsııalyq zań jobasy kelip tústi. Bul zań jobasy Memleket basshysynyń 2021 jylǵy 1 qyrkúıektegi Joldaýyn iske asyrý jónindegi jalpyulttyq is-sharalar josparyna sáıkes ázirlendi. Zań jobasynyń basty maqsaty – bıliktiń ókildi tarmaǵyna áıelder jáne jastarmen qatar, erekshe qajettilikteri bar adamdardyń qatysýyn qamtamasyz etý, sondaı-aq olardyń pikirin eskerý, memleket tynys-tirshiligine belsendi jumysqa tartý. Komıtet atalǵan zań jobasy qorytyndy ázirleýge daıyn», - dedi Májilistiń Zańnama jáne sot-quqyqtyq reforma komıtetiniń tóraǵasy, depýtat Arman Qojahmetov palatynyń jalpy otyrysynda.

Sonymen qatar, Májilis depýtattary aldaǵy ýaqytta «Saıası partııalar týraly» Qazaqstan Respýblıkasynyń Zańyna ózgeris engizý týraly» zań jobasyn da talqylaıtyn bolady.

«Bul zań jobasy da Memleket basshysynyń Joldaýyn oryndaýǵa baǵyttalǵan. Qujat erekshe qajettilikteri bar adamdardy qosa otyryp, partııalyq tizimde kvotalanatyn sanattardy keńeıtý maqsatynda ázirlendi. Komıtet atalǵan zań jobasy boıynsha qorytyndy ázirleýge daıyn», - dedi A. Qojahmetov.