Májilis saýda qyzmetin retteýge baǵyttalǵan zań jobasyn maquldady
ASTANA. QazAqparat - Búgin Májilistiń jalpy otyrysynda palata depýtattary «Qazaqstan Respýblıkasynyń keıbir zańnamalyq aktilerine saýda qyzmetin retteý máseleleri boıynsha ózgerister men tolyqtyrýlar engizý týraly» zań jobasyn ekinshi oqylymda maquldady.
Qujattyń maqsaty saýda qyzmetin memlekettik retteýdiń ádisteri men nysandaryn júıelendirý, elektrondyq saýda salasyndaǵy kásipkerlik sýbektileriniń qyzmetin odan ári jetildirý bolyp otyr. Sonymen qatar, zań jobasynda elimizdiń syrtqy saýdany retteý salasyndaǵy zańnamasyn halyqaralyq sharttarǵa, sonyń ishinde Keden odaǵy men DSU normalaryna sáıkestendirý kózdeledi.
Budan bólek, zań jobasynda elektrondyq saýdany júzege asyrý barysynda satýshynyń, onyń ishinde satýshynyń ózi týraly aqparat berý mindeti qarastyrylyp otyr. Sonymen qatar, elektrondyq saýda barysynda tutynýshylardyń quqyqtaryn qorǵaý normasy qamtylady.
«Ekinshi oqylym barysynda zań jobasy aıasynda EKSPO-2017 nysandary boıynsha sáýlet-qurylys qujattamalaryn (tehnıkalyq-ekonomıkalyq negizdeme jáne jobalaý-smetalyq qujaty) bekitýdiń jalpy tártibin belgileıtin túzetýler engizilgen. Óıtkeni, nysandardyń bir bóligi jekemenshik ınvestıtsııalar esebinen salynýda. Sonymen qatar, Úkimet quzyretinen EKSPO-2017 nysandary sáýlet-qurylys qujattamalaryn bekitý týraly norma alyp tastaldy», - deıdi depýtat Elena Tarasenko.
Budan basqa, zań jobasymen «100 naqty qadam» Ult josparyn júzege asyrýǵa baǵyttalǵan normalar da qamtylyp otyr.
