Májilis salyqtyq jáne kedendik ákimshilendirýdi jetildirýge baǵyttalǵan zań jobasyn maquldady
Atalǵan zań jobasy «100 naqty qadam» Ult josparynyń 39, 65, 67 qadamdaryn iske asyrýǵa baǵyttalady. Bul rette salyqtyq jáne kedendik ákimshilendirýdi jetildirý jolymen qolaıly kásipkerlik ortany qalyptastyrý kózdeledi. Sonymen qatar, salyq saıasatyn odan ári jetildirý arqyly turaqty damýǵa, bıznesti keńeıtýge, olardyń básekelestigin yntalandyrýǵa baǵyttalǵan normalar engiziledi.
«Bul rette 2015 jylǵy 1 qańtardan 2016 jyldyń 1 shildesine deıin ekinshi deńgeıli bankterine QR Ulttyq bankiniń ıpotekalyq turǵyn úı qaryzdaryn qaıta qarjylandyrý baǵdarlamasyna kiretin bereshekti keshirý kezinde jeke tabys salyǵynan bosatý usynylyp otyr. Al Astana jáne Almaty qalalarynyń áýejaılaryn qospaǵanda, áýejaı ınfraqurylymdary boıynsha zańdy tulǵalar úshin múlik salyǵynyń mólsherlemesin 1,5 paıyzdan 0,1 paıyzǵa tómendetiledi. Sonymen qatar, turǵyndardyń áleýmettik álsiz toptary úshin jeke tabys salyǵyn tóleý kezinde salyq salynbaıtyn tabysty 55-ten 75 eń tómengi jalaqyǵa deıin ulǵaıtý qarastyrylady. Sonymen qatar, qoǵamdyq uıymdarǵa qozǵaltqyshtyń kólemi 3000 tekshe santımetrge deıingi bir jeńil avtokólik jáne bir avtobýs boıynsha kólik quraldary salyǵyna jeńildikter beriledi», - deıdi qujattyń jańalyqtarymen tanystyrǵan Ulttyq ekonomıka mınıstri Erbolat Dosaev.
Onyń aıtýyna qaraǵanda, zań jobasynda taýarlardy ımporttaý kezinde qosylǵan qun salyǵyn esepke alý ádisimen tólenetin normalardyń qoldaný merzimi 2022 jylǵa deıin uzartylady.
Budan bólek, zań jobasynda kishi jáne asa kishi avıatsııany damytý maqsatynda azamattyq avıatsııa boıynsha sertıfıkattaýda birqatar alymdar alynyp tastalady.
Sonymen qatar, salyq salý saıasatyna oraı, munaı óndirý kezinde ónerkásiptik ilespe gazdyń ózindik qunyn anyqtaý formýlalary bekitiledi. Shıki munaı men munaı ónimderin barrelızatsııalaý koeffıtsentin anyqtaý tártibi bekitiledi.
«Tutastaı alǵanda, salyq kodeksine usynylyp otyrǵan túzetýler ákimshilik tıimdiligine, bıznesti ońtaılandyrýǵa, salyq bazasyn keńeıtýge jáne memlekettik qyzmet kórsetýdi jaqsartýǵa baǵyttalyp otyr. Bul rette zań jobasyn qabyldaý qolaıly bıznes ortany qurýǵa, memlekettiń strategııalyq maqsattaryn iske asyrýǵa jáne odan ári turaqty áleýmettik-ekonomıkalyq damý úshin yqpal etetin bolady», - dedi mınıstr Erbolat Dosaev.
