Májilis salyq salý máselelerine arnalǵan zań jobasyn ekinshi oqylymda maquldady
ASTANA. Qazannyń 27-si. QazAqparat /Qanat Mámetqazyuly/ - Búgin QR Parlamenti Májilisiniń jalpy otyrysynda palata depýtattary «Qazaqstan Respýblıkasynyń keıbir zańnamalyq aktilerine salyq salý máseleleri boıynsha ózgerister men tolyqtyrýlar engizý týraly» zań jobasyn ekinshi oqylymda maquldady.
Esterińizge sala keteıik, atalǵan zań jobasy memlekettiń qarjylyq qajettilikterin qamtamasyz etý, halyqaralyq salyq salý júıesin jetildirý jáne halyqaralyq tájirıbege sáıkes salyq salý máseleleri jónindegi halyqaralyq sharttardy ákimshilendirý, sondaı-aq salyq zańnamasynyń jekelegen normalaryn naqtylaý maqsatynda ázirlengen.
Osy maqsatta «Salyq jáne bıýdjetke tólenetin basqa da mindetti tólemder týraly» Qazaqstan Respýblıkasynyń Kodeksin (Salyq kodeksi) qoldanysqa engizý týraly» Qazaqstan Respýblıkasynyń 2008 jylǵy 10 jeltoqsandaǵy Zańyna tıisti ózgerister engiziletin bolady. Óıtkeni osy Zańda belgilengen paıdaly qazbalardy óndirýge salynatyn salyq stavkalary jer qoınaýyn paıdalanýshylar úshin korporatıvtik tabys salyǵynyń stavkalaryn kezeń-kezeńimen tómendetýden bolatyn bıýdjet shyǵyndaryn boljamdaǵan.
Budan basqa, jeke tulǵalardyń tabystaryna salyq salýdyń progressıvtik shákilin belgileý maqsatynda jeke tulǵalardyń tabysyna salynatyn salyq stavkalaryn ózgertý kózdelip otyr. Bul rette progressıvtik shákil engizilip otyr, munda úlken tabystarǵa salyq neǵurlym joǵary stavkalarmen salynady jáne jeke tabys salyǵynyń eń joǵary stavkasy korporatıvtik tabys salyǵynyń 20 paıyzǵa teń stavkasymen teńesedi. Halyqaralyq salyq salý júıesin jetildirý maqsatynda zań jobasynda salyq salý maqsatynda rezıdent emestiń turaqty mekemesin qurý ólshemderi naqtylanady jáne rezıdent emestiń turaqty mekemesin tirkeý tártibi reglamentteledi. Óıtkeni Kodekstiń qoldanystaǵy redaktsııasy anyqtyq prıntsıpine tolyǵymen sáıkes kele bermeıdi jáne ártúrli maǵynada túsinýge ákep soqtyrady.
Qujatty ekinshi oqylymda talqylaý barysynda depýtattar arasynda temeki ónimderi aktsızderine baǵany arttyrýǵa qatysty pikir qaıshylyqtary oryn alǵan bolatyn. Birqatar talqylaýlardan keıin atalǵan norma Qarjy jáne bıýdjet komıtetiniń usynǵan redaktsııasynda qabyldandy. «Biz qabyldaǵan túzetýler boıynsha Úkimet 2011 jyldan bastap temeki ónimderine aktsızderdi 0,25 paıyzǵa kóterý týraly usynys engizgen bolatyn. Biz Úkimettiń osy usynysyn keńeıttik. Ol boıynsha aktsızder baǵasy tek 2011 jyly 0,25 paıyzǵa ǵana emes, kelesi 2012-13 jyldary da satylap kóteriletin bolady», dedi depýtattar aldynda túsinik bergen Komıtet tóraıymy Gúljan Qaraǵusova.
Májilis maquldaǵan zań jobasy endi Parlament Senatyna jiberiledi.
