Májilis ruqsat berý qujattarynyń sanyn 30 paıyzǵa qysqartatyn jobany maquldady
ASTANA. 20 maýsym. QazAqparat - Búgin QR Parlamenti Májilisiniń jalpy otyrysynda palata depýtattary «Qazaqstan Respýblıkasynyń keıbir zańnamalyq aktilerine ruqsat berý qujattaryn qysqartý jáne memlekettik organdardyń baqylaý-qadaǵalaý fýnktsııalaryn ońtaılandyrý máseleleri boıynsha ózgerister men tolyqtyrýlar engizý týraly» zań jobasyn ekinshi oqylymda maquldady.
Qujat Parlament Senatyna joldanatyn bolady.
Atalǵan qujat Memleket basshysynyń lıtsenzııalar men ruqsat berý qujattarynyń sanyn taǵy da qosymsha 30 paıyzǵa qysqartý týraly tapsyrmasyna oraı ázirlengen bolatyn.
Osyǵan oraı, zań jobasyna sáıkes 1096 ruqsat qujattardyń joǵary qaýip-qaterden saqtandyrýdy qamtamasyz etýge áser etpeıtin 40-y habarlandyrý tártibine almastyrylady. Al azamattardyń ómiri men densaýlyǵyna tikeleı qaýip tóndirmeıtin aqparattyq sıpattaǵy 257-si alynyp tastalady. Sóıtip, qoryta aıtqanda, ruqsat qujattardyń 30 paıyzǵa jýyǵy qysqartylady.
Bul rette qujat qoldanystaǵy 80 zańnamalyq aktige ózgerister engizýdi kózdeıdi. Atap aıtqanda, lıtsenzııalaý qaǵıdattaryna sáıkes kelmeıtin qyzmettiń jekelegen túrlerin lıtsenzııalaý joıylady. Sondaı-aq, memlekettik organdardyń baqylaý-qadaǵalaý fýnktsııalary qysqartylady. Al, jańadan qurylǵan shaǵyn jáne orta kásipkerlik sýbektilerin 3 jyl ishinde tekserýge tyıym salý kózdeledi.
