Májilis respýblıkalyq bıýdjet boıynsha naqtylaý jobasyn maquldady
«Ózekti áleýmettik máselelerdi sheshý týraly Memleket basshysynyń tapsyrmasyn iske asyrýdy qarastyratyn 2019 jylǵa arnalǵan respýblıkalyq bıýdjetti naqtylaý jobasy usynylyp otyr. Zań jobasy 2019 jylǵa arnalǵan eldiń áleýmettik-ekonomıkalyq damý boljamynyń kórsetkishterin saqtaýdy eskere otyryp qalyptastyryldy. Respýblıkalyq bıýdjettiń negizgi parametrleri ózgerissiz qalady. Prezıdenttiń tapsyrmalaryn iske asyrýdy qarjylyq qamtamasyz etý Tikeleı ınvestıtsııalar qoryn qurýǵa kózdelgen qarajattyń bir bóligin qaıta bólý esebinen júzege asyrylatyn bolady», - dedi QR Premer-Mınıstriniń birinshi orynbasary-Qarjy mınıstri Álıhan Smaıylov.
Bıýdjettiń shyǵys bóligin naqtylaý úsh baǵyt boıynsha júzege asyryldy. Birinshiden, halyqtyń tutynýshylyq kredıtteri boıynsha borysh júktemesin azaıtý eskerilgen. Ómirlik qıyn jaǵdaıda qalǵan azamattar sanatyna jatqyzylǵan árbir qaryz alýshy úshin tikeleı jáne ataýly qarjylyq kómek retinde memleket 300 myń teńgege deıingi jalpy mólsherde negizgi boryshty jáne ol boıynsha eseptelgen syıaqyny óteıdi. Osy maqsattarǵa joba 89,2 mlrd teńge somasynda shyǵystardy qarastyryp otyr.
Ekinshi baǵyt jumyspen qamtý, az qamtylǵan, kópbalaly otbasylar men jastardy qoldaý boıynsha pármendi sharalardy keńeıtý jáne kúsheıtýdi qamtyp otyr. Bul maqsattarǵa 138,6 mlrd teńge baǵyttalatyn bolady.
«Úshinshi baǵyt boıynsha jobada Úkimet rezervin 72,9 mlrd teńgege ulǵaıtý usynylady. Atalǵan qarajattyń bir bóligi Arys qalasyndaǵy tótenshe jaǵdaıdyń saldarlaryn joıýǵa baǵyttalatyn bolady. Budan basqa, 35,9 mlrd teńge qarajatty ishki qaıta bólý esebinen shuǵyl sheshýdi qajet etetin mindettemelerdi qarjylandyrý iske asyrylady», - dep naqtylady Á. Smaıylov.
Budan buryn habarlanǵandaı, jalpy otyrys barysynda Ulttyq ekonomıka mınıstri Rýslan Dálenov eldiń 2019 jylǵa arnalǵan áleýmettik-ekonomıkalyq damý boljamy kórsetkishteri bıylǵy sáýirde túzetilgen boljam deńgeıinde saqtalatynyn aıtty.
Eske sala keteıik, Parlamenttiń tórtinshi sessııasy 2019 jylǵy 5 shildege deıin uzartyldy.
Atap aıtqanda, mańyzdy sharalardy iske asyrý úshin 2019-2021 jyldarǵa arnalǵan respýblıkalyq bıýdjet týraly zańǵa ózgeristerdi engizý qajet boldy. Osyǵan baılanysty bıýdjetke engiziletin ózgeristerdi qarastyrý úshin Parlament sessııasynyń jumys merzimi uzartyldy.