Májilis radıoaktıvti qaldyqtarmen jumys isteý qaýipsizdigine baǵyttalǵan zań jobasyn maquldady
ASTANA. Qańtardyń 13-i. QazAqparat /Qanat Mámetqazyuly/ - Búgin QR Parlamenti Májilisiniń jalpy otyrysynda «Paıdalanylǵan otynmen jumys isteý qaýipsizdigi týraly jáne radıoaktıvti qaldyqtarmen jumys isteý qaýipsizdigi týraly birikken konventsııany ratıfıkatsııalaý týraly» zań jobasy maquldandy,
dep habarlaıdy QazAqparat.
Atalǵan konventsııaǵa 1997 jyly qyrkúıek aıynda qol qoıylǵan. Konventsııanyń negizgi maqsaty ulttyq sharalardy jáne halyqaralyq yntymaqtastyqty, onyń ishinde tıisti jaǵdaılarda qaýipsizdik salasyndaǵy tehnıkalyq yntymaqtastyqty nyǵaıtý jolymen búkil álemde paıdalanylǵan otynmen jáne radıoaktıvti qaldyqtarmen jumys isteý qaýipsizdiginiń joǵary deńgeıine qol jetkizý jáne ony qoldaý bolyp tabylady. Konventsııany ratıfıkatsııalaý Qazaqstannyń paıdalanylǵan otynmen jáne radıoaktıvti qaldyqtarmen jumys isteýdiń halyqarlyq standarttarǵa sáıkes qaýipsiz júıesin jasaý nıetin aıǵaqtaıdy. Sol arqyly Qazaqstannyń atom energııasyn beıbit maqsatta paıdalaný salasyndaǵy halyqaralyq yntymaqtastyǵyn odan ári damytýǵa yqpal etetin bolady.
Búgingi kúni elimizdegi atom energetıkasynyń negizin qurý, ıadrolyq energetıka salasyn damytý baǵytynda birqatar belsendi sharalar atqarylýda. Osy rette atalmysh halyqaralyq konventsııany ratıfıkatsııalaý ıadrolyq qyzmet qaýipsizdigi júıesiniń tıimdi jumys isteýine qajetti halyqaralyq standarttarǵa sáıkes negizgi quqyqtyq quraldardy engizýge baǵyttalady. Osynyń nátıjesinde atom energetıkasymen baılanysty qyzmetterdi júzege asyrý, halyqty jáne qorshaǵan ortany qorǵaý deńgeıin kóterý sharalary qamtylady.
