Májilis prokýrordyń qaýlysyn oryndamaǵany úshin jaýaptylyqty belgileıtin qujatty maquldady
NUR-SULTAN. QazAqparat – Parlament Májilisiniń jalpy otyrysynda «Qazaqstan Respýblıkasynyń Ákimshilik quqyq buzýshylyq týraly kodeksine ózgerister men tolyqtyrýlar engizý týraly» zań jobasy ekinshi oqylymda maquldandy, dep habarlaıdy QazAqparat tilshisi.
Zań jobasy:
- qabyldaýshy taraptyń jumyskerlerimen salystyrǵanda jiberýshi taraptyń jumyskerlerine qatysty kemsitýshilik úshin qabyldaýshy taraptyń ákimshilik jaýaptylyǵyn belgileýge;
- alaýlarda jáne statsıonarlyq kózderde gazdy jaǵýdan lastaǵysh zattardyń shyǵaryndylary úshin aıyppuldy esepteý kezinde kemsitýshilik tásildi joıýǵa;
- memlekettik baqylaý nátıjeleri boıynsha anyqtalǵan quqyq buzýshylyqtar úshin tulǵalardy ákimshilik jaýaptylyqqa tartý úshin eskirý merzimin ulǵaıtýǵa;
- quqyq qoldaný praktıkasynyń qaýipti óndiristik obektilerge zańsyz kirýge jáne paıdaly qazbalardy zańsyz óndirýge baılanysty problemalaryn sheshýge;
- prokýrordyń qaýlysyn oryndamaǵany úshin jaýaptylyqty belgileýge baǵyttalǵan.
Májilistiń Zańnama jáne sot-quqyqtyq reforma komıtetiniń málimetinshe, «Qazaqstan Respýblıkasynyń keıbir zańnamalyq aktilerine personal berý jónindegi qyzmetterdi kórsetý máseleleri boıynsha ózgerister men tolyqtyrýlar engizý týraly» Zańynda «jiberýshi tarap», «qabyldaýshy tarap» degen jańa uǵymdar engizilgenine, sondaı-aq olardyń quqyqtary men mindetteri bekitilgenine baılanysty jumyskerlerdiń zańdy quqyqtary men múddelerin taraptardyń saqtamaǵany úshin ákimshilik jaýaptylyq sharalaryn kózdeý usynylady.
Personal berý jónindegi qyzmetterdi kórsetýge shart jasasý kezinde de, onyń qoldanylý kezeńinde de jiberýshi tarapty tártipke keltiretin ákimshilik jaýaptylyqty belgileý usynylady. Atalǵan shara jiberýshi tarap jumyskerleriniń eńbegine aqy tóleý boıynsha qabyldaýshy taraptyń jumyskerlerimen salystyrǵanda uqsas laýazymy, tıisti biliktiligi, mamandyǵy nemese kásibi, sondaı-aq eńbek jaǵdaılary jáne sol jumys kólemi boıynsha kemsitýshilikti bolǵyzbaýǵa múmkindik beredi.
Sondaı-aq qaryzdyq eńbek jumyskerleriniń (jiberýshi taraptyń) zańdy quqyqtary men múddelerin qorǵaý maqsatynda jiberýshi taraptyń jumyskerleri úshin Qazaqstan Respýblıkasynyń eńbek zańnamasynda kózdelgen jumys ýaqyty men kúndelikti jumystyń (jumys aýysymynyń) qalypty jáne qysqartylǵan uzaqtyǵyn zańsyz asyrǵany úshin qabyldaýshy taraptyń ákimshilik jaýaptylyǵyn belgileý usynylady.
Jeke kásipkerlik sýbektilerin qoldaý jáne qorǵaý salasyndaǵy memlekettik baqylaý nátıjeleri boıynsha anyqtalǵan quqyq buzýshylyqtar úshin tulǵalardy ákimshilik jaýaptylyqqa tartý úshin eskirý merzimin bir jylǵa deıin ulǵaıtý, sondaı-aq prokýror qaýlysyn oryndamaǵany úshin jaýaptylyqty belgileý usynylady.
Prokýrordyń qaýlysyn oryndamaǵany úshin ákimshilik jaýaptylyqty belgileý, eń aldymen, kásipkerlerdi memlekettik organdardyń zańsyz áreketterinen qorǵaýǵa baǵyttalǵan. Usynylyp otyrǵan qural prokýrorlyq qadaǵalaýdyń pármendi jáne tıimdi quraldarynyń birine aınalady jáne kásipkerlerdi qorǵaýdyń deńgeıin arttyrady.
Budan buryn habarlanǵandaı , bıyl 2 maýsymda Parlament Májilisi «Qazaqstan Respýblıkasynyń Ákimshilik quqyq buzýshylyq týraly kodeksine ózgerister men tolyqtyrýlar engizý týraly» zań jobasyn birinshi oqylymda maquldandy.
