Májilis Prezıdent Joldaýyn iske asyrý boıynsha zań jobalaryn qaraıdy

NUR-SULTAN. QazAqparat - Búgin Májilis Spıkeri Nurlan Nyǵmatýlınniń tóraǵalyǵymen Palata Bıýrosy ótip, onda aldaǵy jalpy otyrystyń kún tártibi naqtylandy, dep habarlaıdy QazAqparat Májilistiń baspasóz qyzmetine silteme jasap.

Májilis birinshi oqylymda «Qazaqstan Respýblıkasynyń Úkimeti týraly» Konstıtýtsııalyq zańǵa ózgerister engizý jáne Memleket basshysynyń 2020 jylǵy 1 qyrkúıektegi «Jańa jaǵdaıdaǵy Qazaqstan: is-qımyl kezeńi» atty Qazaqstan halqyna Joldaýynyń jekelegen erejelerin iske asyrýǵa qatysty zań jobasyn talqylamaq.

Sonymen qatar, Palata birinshi oqylymda týrıstik qyzmet, normashyǵarmashylyqty jetildirý máseleleri boıynsha túzetýler jáne advokattyq qyzmet pen zań kómegine qatysty depýtattyq zań jobalaryn qaraıtyn bolady.

Aldaǵy jalpy otyrysta ortalyq jáne jergilikti memlekettik organdar arasynda aýyzsýmen jabdyqtaýdy sýbsıdııalaý jónindegi ókilettikterdiń arajigin ajyratý máseleleri boıynsha depýtattyq zań jobasy birinshi oqylymda qaralady dep josparlanýda.

Sondaı-aq, depýtattardyń qaraýyna dene shynyqtyrý jáne sport máseleleri boıynsha zań jobasy da usynyldy.

Bıýronyń kún tártibiniń jobasynda Májilis depýtattary ekinshi oqylymda birqatar ekologııalyq zań jobalaryn qaraıdy. Olar Ekologııalyq kodekspen oǵan ilespe zań jobalary.

Ekinshi oqylymda qaralatyndar qatarynda qoǵamdyq keńesterdiń qyzmeti týraly jáne depýtattar ázirlegen kúzet qyzmeti máseleleri zań jobalary, sondaı-aq, adamdardy Qazaqstan sheginen tys jerge shyǵaryp jiberýge jáne bıýdjet zańnamasyn jetildirýge qatysty zań jobalary bar.

Sonymen birge aldaǵy jalpy otyrysta Palata dıplomatııalyq qyzmet týraly zań jobasyn jumysqa almaq.