Májilis Prezıdent sheshim qabyldaǵanǵa deıin qalypty tártippen jumys isteı beredi - Q. Jaqypov
ASTANA. QazAqparat - Májilis Prezıdent sheshim qabyldaǵanǵa deıin qalypty tártippen jumys isteı beredi. Búgin Májilistiń jalpy otyrysynda palata Tóraǵasy Qabıbolla Jaqypov osylaı málimdedi. Eske salaıyq, búgin Májilistiń jalpy otyrysynda palata depýtattary besinshi saılanǵan Parlamentti taratý jáne jańa saılaýdy taǵaıyndaý týraly QR Prezıdentiniń atyna Úndeý joldaǵan bolatyn.
«Búgin tarıhı Úndeý qabyldadyq. Májilis apparaty Prezıdent atyna joldanatyn Úndeýdi uıymdastyrady. Al Elbasy bir apta, on kún shamasyndaǵy tártippen qaraıtyn shyǵar. Sosyn óziniń sheshimin qabyldaıdy. Bunyń tártibi sondaı», - dep atap ótti jıyndy qorytyndylaǵan palata spıkeri Qabıbolla Jaqypov.
Sonymen qatar, spıker depýtattardyń jumysyna sáttilik tiledi. «Bizge budan keıingi shaqyrylymdarda da (Parlamenttiń shaqyrylymdary red.) kezdesýge jazsyn. Men osyny tileımin. Al endi qandaı da bir máseleler bolsa, biz habarlap otyramyz, degenmen jumys tártibimiz burynǵy rejımde saqtalady», - dedi Q. Jaqypov.
