Májilis: Polıtsııa toqtatqan jaǵdaıda kólikten ruqsatsyz ketýge tyıym salynatyn norma alyp tastalady
ASTANA. QazAqparat - Búgin Parlament Májilisiniń jalpy otyrysynda palata depýtattary «Jol júrisi týraly» QR zańyna ózgerister men tolyqtyrýlar engizý týraly» zań jobasyn birinshi oqylymda maquldady. Atalǵan qujatqa Májilistiń birqatar depýtattary bastamashylyq jasaǵan bolatyn.
Aıta keterligi, «Jol júrisi týraly» qoldanystaǵy zań byltyrǵy jyly qabyldanyp, ondaǵy normalar qoǵamda úlken rezonans týdyrǵan edi. Atap aıtqanda, kóliktegi balalarǵa arnalǵan avtokreslony paıdalaný normasyna halyqtyń ázirligi tıisti deńgeıde bolmaı, bul norma kúshine enbeı jatyp-aq túzetýge ushyraǵan. Al zańǵa engizilip otyrǵan jańa ózgerister men tolyqtyrýlar byltyrǵy olqylyqtardy joıýǵa baǵyttalyp otyr. Atap aıtqanda, qoldanystaǵy zańda ishki ister organdarynyń qyzmetkeri toqtatqan jaǵdaıda, jolaýshylardyń kólik quralynan qyzmetkerdiń ruqsatynsyz ketýine tyıym salynatyn norma qamtylǵan. Al jańa zań jobasynda depýtattar atalǵan normany alyp tastaýdy usynyp otyr. Buǵan qosa, zań jobasynda júrgizýshilerdiń tıisti jol belgilerimen jáne nusqaýlyqtarymen belgilengen, toqtaý úshin arnaıy bólingen oryndardan basqa, eldi mekenderdiń joldary men kóshelerinde toqtaýyna tyıym salatyn normany da alyp tastaý kózdeledi. Buǵan atalǵan oryndarda tıisti ınfraqurylymdardyń bolmaýy eń basty sebep bolyp otyr. Aıta keterligi, zańnyń joǵaryda atalǵan normalary halyq arasynda birjaqty qabyldanbaǵan bolatyn. Budan bólek, Májilis depýtattary zańnamadaǵy turaqtar týraly normany da alyp tastaýdy usyndy, óıtkeni bul norma qoldanystaǵy basqa zańda kózdelgen. Sonymen birge kólik nómirlerindegi tsıfrlar nemese tsıfrlar men áripter belgili bir túrde úılestirilgen memlekettik tirkeý nómirlerin alǵany úshin memlekettik bajdy ulǵaıtý da qarastyrylady. Zań jobasynyń jańa usynystaryna qatysty depýtattardyń pikiri birjaqty bolmady. Degenmen birshama talqylaýdan soń tómengi palata depýtattary qujatty birinshi oqylymda maquldaý týraly sheshim qabyldady. Endi zań jobasy ekinshi oqylymǵa ázirlenetin bolady.
