Májilis pen Senat arasynda kelisim komıssııasy qurylatyn boldy
ASTANA. QazAqparat - Búgin Parlament Májilisiniń jalpy otyrysynda palata depýtattary «Qazaqstan Respýblıkasynyń keıbir zańnamalyq aktilerine memlekettik basqarý júıesin odan ári jetildirý máseleleri boıynsha ózgerister men tolyqtyrýlar engizý týraly» zań jobasyna Senat engizgen túzetýlerdi talqylady. Senatorlardyń birqatar usynystarymen kelispegen májilis zań jobasy boıynsha qos palata arasyndaǵy kelisim komıssııasyn qurý týraly qaýly qabyldady.
Eske sala keteıik, atalmysh zań jobasy Memleket basshysynyń 2014 jyldyń 6 tamyzyndaǵy «Qazaqstan Respýblıkasynyń memlekettik basqarý júıesin ári qaraı jetildirý sharalary týraly» Jarlyǵyn iske asyrý aıasynda ázirlengen. Jarlyqqa sáıkes, memlekettik qyzmet isteri jónindegi jáne ekonomıkalyq jáne sybaılas jemqorlyqqa qarsy kúres agenttigi taratylyp, Memlekettik qyzmet jáne jemqorlyqqa qarsy turý isi jónindegi agenttik qurylǵan edi. Osyǵan baılanysty, zań jobasy taratylǵan agenttiktiń jemqorlyq qylmystyń jáne zań buzýshylyqtyń aldyn alý, anyqtaý, jolyn kesý, ashý, tekserý jónindegi fýnktsııalary men ókilettikterin jańa qurylǵan agenttikke, al ekonomıkalyq jáne qarjy qylmysy men zań buzýshylyqty Qarjy mınıstrligine ótkizip berý qaralǵan. Agenttik pen qarjy mınıstrliginiń tıisti bólimshelerine quqyq qorǵaý organy mártebesi beriledi.
«Senat tarapynan jańa Qylmystyq-protsessýaldyq kodekstiń 484-babyna sáıkes, ózgerister engizýdi usynylady. Al bas komıtet Májilis depýtattarynyń pikirin eskere kele, atalǵan normanyń azamattardyń sot qorǵaýyna qatysty konstıtýtsııalyq quqyqtaryn qozǵaıdy dep sanap otyr. Sondyqtan, komıtet Senat engizgen tolyqtyrýmen kelispeıdi», - dedi Májilis depýtaty Ramazan Sárpekov. Osyǵan oraı, qos palata arasynda qurylatyn kelisim komıssııasynyń quramyna Májilis depýtattary saılandy.
