Májilis pen Parlamentaralyq odaq yntymaqtastyqty nyǵaıtý jóninde kelisimge keldi
Parlamentshiler yntymaqtastyqty damytý baǵyttaryn talqylap, birlesken is-sharalar ótkizý jóninde kelisimge keldi.
E.Qoshanov pen D.Pasheký Álemdik jáne dástúrli dinder kóshbasshylarynyń VII sezinnen alǵan áserlerimen bólisti. Keshe alqaly jıynǵa Parlamentaralyq odaqtyń basshysy da qatysqan bolatyn. Májilis Spıkeri Dýarte Pashekýǵa dinaralyq dıalogty nyǵaıtýdaǵy Qazaqstan saıasatyna qoldaý bildirgeni úshin alǵys aıtty.
– Sezd nátıjesi men deklaratsııasy álem elderiniń úkimetteri, halyqaralyq uıymdar, sonyń ishinde BUU ınstıtýttary úshin toleranttylyq, ózara qurmet pen beıbitshilik mádenıetin ilgeriletýde mańyzdy baǵdar bolaryna senemin. Keıbir máseleler Parlamentaralyq odaqtyń aldaǵy is-sharalarynyń kún tártibine de engizilýi múmkin, – dedi E.Qoshanov.
Óz kezeginde Dýarte Pasheký álemdegi qaqtyǵystardyń kóbi dinı sebepterden týyndaıtynyn aıtty. Sondyqtan rýhanı kóshbasshylar halyqqa dinniń janjalǵa sebep bolmaıtynyn túsindirýi kerek ekenine nazar aýdardy.
– Bul turǵyda Qazaqstannyń jáne el Prezıdentiniń róli aıryqsha ekenin atap ótken jón. Óıtkeni sizdiń el túrli dinı aǵym ókilderi beıbit ómir súre alatynynyń úlgisine aınalyp otyr. Al Qasym-Jomart Toqaevtyń sezd jumysyn jalǵastyrý jáne nyǵaıtý jónindegi ustanymy – búkil álem úshin óte jaqsy bastama, – dedi Parlamentaralyq odaqtyń tóraǵasy.
Taraptar yntymaqtastyqty damytý baǵyttaryn talqylaı kele, Parlament Májilisi men Parlamentaralyq odaq arasyndaǵy baılanysty nyǵaıtýǵa kelisti. Ásirese, ekologııalyq máselelerdiń ózektiligine erekshe mán berdi.
– Qazaqstannyń ekologııany jaqsartýǵa baǵyttalǵan reformalary Ortalyq Azııa elderine úlgi bola alady, – dedi D.Pasheký.
Sońynda D.Pasheký kelesi jyly Parlamentaralyq odaq is-sharalarynyń birin Qazaqstan astanasynda ótkizýdi usynyp, qazaqstandyq parlamentshilerdi atalǵan odaq pen Assambleıanyń is-sharalaryna qatysýǵa shaqyrdy.
Kezdesýge Portýgalııanyń Qazaqstandaǵy Tótenshe jáne Ókiletti Elshisi Marııa de Fatıma Veles de Andrade Mendesh jáne Parlament Senaty men Májilis depýtattary qatysty.
Aıta ketý kerek, Parlamentaralyq odaq – quramyna 179 memleket kiretin eń kóne halyqaralyq parlamenttik uıym. Shtab-páteri Jenevada ornalasqan. Odaq BUU-men tyǵyz yntymaqtastyqta jumys isteıdi jáne onyń maqsat-mindetterin basshylyqqa alady. Qazaqstan Parlamentiniń depýtattary Odaqtyń resmı is-sharalaryna turaqty túrde qatysyp keledi. Bul Parlamentaralyq odaqtyń tóraǵasy Dýarte Pashekýdyń Qazaqstan astanasyna ekinshi sapary. Alǵash ret 2021 jyldyń jeltoqsan aıynda kelgen bolatyn.
