Májilis pen máslıhattar depýtattarynyń saılaýy óreskel zańbuzýshylyqtarsyz qalypty jaǵdaıda ótýde - Bas prokýratýra
ASTANA. 15 qańtar. QazAqparat /Aıdar Ospanalıev/ - Bas prokýratýranyń resmı ókili Nurdáýlet Súıindikovtyń aıtýynsha, Qazaqstanda Májilis pen máslıhattar depýtattarynyń saılaýy óreskel zańbuzýshylyqtarsyz qalypty jaǵdaıda ótýde.
Bul týraly ol búgin Ortalyq saılaý komıssııasynda jýrnalıstermen bolǵan brıfıngte aıtty.
Resmı ókildiń sózinshe, saılaý jarııalanǵan kúnnen bastap, azamattardyń saılaý protsesine qatysty ótinishteri, aryzdary men shaǵymdary Qazaqstannyń «Saılaý týraly» konstıtýtsııalyq zańymen belgilengen erekshe tártipten qabyldanyp, qaralýda. «Azamattardyń ótinishterin qysqa merzimde qaraý osy erekshe tártiptiń eń basty negizi. Sondaı-aq daýys berý kúninen bes kún buryn jáne daýys berý kúni túsetin aryz-shaǵymdar jedel qaralýǵa jatady»,-dedi resmı ókil.
Onyń sózinshe, Bas prokýratýranyń ókimi boıynsha Bas prokýratýrada jáne aımaqtyq prokýratýralarda saılaý úderisi bastalǵan kezden-aq prokýratýranyń eń tájirıbeli qyzmetkerlerinen quralǵan jumys toptary qyzmet etýde. «Prokýratýraǵa túsip jatqan aryz-shaǵymdardy osy top músheleri qaraýda. Prokýratýra organdary ózderi atqarǵan ister men saılaý protsesindegi zańdylyqtyń saqtalýy týraly málimetterdi arnaıy sholý etip halyqqa jarııalap otyrady. Búgingi kúnge deıin prokýratýra organdary osyndaı 3 sholý jasady. Onda kóterilgen máselelermen Bas prokýratýranyń resmı saıtynan tanysýǵa bolady»,-dedi N.Súıindikov.
