Májilis pen máslıhat saılaýy: Úgit-nasıhat kezeńi bastaldy

ASTANA. QazAqparat – Búgin QR Parlamenti Májilisi jáne barlyq deńgeıdegi máslıhattar saılaýyna túsetin kandıdattar men partııalar úshin úgit-nasıhat kezeńi bastaldy, dep habarlaıdy QazAqparat tilshisi.

Ortalyq saılaý komıssııasy habarlaǵandaı, saılaý aldyndaǵy úgit-nasıhat búgin saǵat 18:00-de bastaldy. Atalǵan naýqan 18 naýryz saǵat 00:00-ge deıin jalǵasady.

18 naýryz – tynyshtyq kúni, al 19 naýryz – saılaý ótedi.

«Ákimshilik quqyq buzýshylyq týraly kodekstiń 112-babynyń 5-bóligine sáıkes saılaýǵa qatysatyn kandıdattardyń, saıası partııalardyń úgit materıaldaryn buqaralyq aqparat quraldary arqyly jarııalaý nemese efır alańyn berýdiń sharttary bar. Tártip boıynsha saılaý aldyndaǵy úgit júrgizý bastalardan bes kún buryn habarlamaǵan jáne jarııalamaǵan, sondaı-aq saılaý komıssııasyna tólem mólsheri týraly málimetterdi usynbaǵan jaǵdaıda laýazymdy tulǵaǵa 30, al zańdy tulǵalarǵa 50 aılyq eseptik kórsetkish mólsherinde aıyppul salýǵa ákep soǵady», - dep eskertedi Ortalyq saılaý komıssııasy.

Buǵan deıin Májilis jáne máslıhat depýtattyǵyna kandıdattarǵa QazAqparat saıtynan ınternet-alań berý sharttary týraly habarlaǵan edik.

Aıta ketsek, úgit materıaldaryn usynǵan kandıdattar olardyń mazmunynyń Qazaqstan Respýblıkasy zańnamasy talaptaryna, onyń ishinde avtorlyq jáne sabaqtas quqyqtar salasyndaǵy talaptarǵa sáıkestigi úshin derbes jaýapty bolady.

Eske salaıyq, Memleket basshysy 19 qańtarda Jetinshi saılanǵan QR Parlamentiniń Májilisin taratý jáne QR Parlamenti Májilisi depýtattarynyń kezekten tys saılaýyn taǵaıyndaý týraly Jarlyqqa qol qoıdy.

Májilis depýtattaryn kezekten tys saılaý 2023 jylǵy 19 naýryzǵa belgilendi.

Májilis jáne máslıhat depýtattyǵyna kandıdattardy usyný 8 aqpanǵa deıin jalǵasty.

Al kandıdattardy tirkeý 20 qańtarda bastalyp, búgin aıaqtaldy.