Májilis pen máslıhat saılaýy: QR OSK halyqaralyq baıqaý ınstıtýtyn ashady

NUR-SULTAN. QazAqparat - QR Ortalyq saılaý komıssııasy shet memleketterdiń, halyqaralyq uıymdardyń baıqaýshylary, sheteldik buqaralyq aqparat quraldarynyń ókilderi qyzmetin uıymdastyratyn qaýly qabyldady, dep habarlaıdy QazAqparat tilshisi.

Atalǵan másele boıynsha sóz sóılegen Ortalyq saılaý kommıssııasynyń múshesi Anastasııa Şegortsovanyń aıtýynsha, Qazaqstanda shet memleketter men halyqaralyq uıymdardyń baıqaýshylary saılaýdy baıqaýǵa Ortalyq saılaý komıssııasynyń Tóraǵasy men Qazaqstan Respýblıkasy Syrtqy ister mınıstriniń shaqyrýy boıynsha qatysa alady.

«Shet memleketter men halyqaralyq uıymdardyń baıqaýshylary OSK Syrtqy ister mınıstrliginiń usynýy boıynsha akkredıtteledi. Sheteldik buqaralyq aqparat quraldarynyń ókili, eger onyń Syrtqy ister mınıstrligi bergen akkredıtteý týraly kýáligi bolsa, saılaýda baıqaýdy júzege asyra alady. Saılaý týraly konstıtýtsııalyq zań sheteldik baıqaýshylarǵa aýdarmashynyń ilesip júrý múmkindigin kózdeıdi», - dedi ol.

Onyń dereginshe, akkredıtteýdi júrgizý daýys berý kúnine bes kún qalǵanda, ıaǵnı 2021 jylǵy 4 qańtarda jergilikti ýaqyt boıynsha saǵat 18.00-de aıaqtalady.

«Búgin Ortalyq saılaý komıssııasy QR Parlamenti Májilisi men máslıhat depýtattaryn saılaýynda halyqaralyq baıqaý ınstıtýtyn ashý týraly sheshim qabyldady. Bul sheshim bizdiń saılaý protsesimizdiń ashyqtyǵy men jarııalylyǵyn qamtamasyz etý turǵysynda halyqaralyq mindettemelerdi qabyldaýymyzdyń rastalýy bolyp tabylady», - dedi QR OSK tóraǵasy Berik Imashev.