Májilis pen máslıhat depýtattarynyń saılaýy eshqandaı zańbuzýshylyqtarsyz ótip jatyr - ІІM
ASTANA. 15 qańtar. QazAqparat /Aıdar Ospanalıev/ - Májilis pen máslıhat depýtattarynyń saılaýy eshqandaı zańbuzýshylyqtarsyz, tynysh ótip jatyr.
Bul týraly búgin saılaýdyń barysyna baılanysty jýrnalıstermen bolǵan brıfıngte Іshki ister mınıstrliginiń Ákimshilik polıtsııa komıtetiniń Basqarma bastyǵy Marat Jeksenbekov málim etti.
«Qazaqstan Respýblıkasynyń «Saılaý týraly» zańyna sáıkes, 15-shi qańtarda Іshki ister organdary úshin jumys kúni bolyp tabylady. Sonymen qatar 10-20 qańtar aralyǵynda ishki ister organdarynyń barlyq jeke quramy kúsheıtilgen rejimde qyzmet etýde. Biz eldegi barlyq saılaý ýchaskelerindegi qaýipsizdikti qamtamasyz etýdemiz»,-dedi basqarma bastyǵy.
Onyń sózinshe, «Saılaý týraly» zańǵa sáıkes, ishki ister organynyń qyzmetkerleri daýys beriletin ǵımaratqa kirmeıdi. Tártip saqshylary tek saılaý komıssııasynyń shaqyrtýymen ǵana daýys berý ǵımaratyna kire alady jáne polıtsııa qyzmetkeri ǵımarat ishindegi tártipti qalypqa keltirgennen soń birden syrtqa shyǵýy tıis. «Saılaý tynysh ári zań talaptaryna saı ótip jatyr. Elde saılaý zańnamalaryn buzý jaǵdaılary oryn alǵan joq. Elimizdiń barlyq aımaqtarynda halyqaralyq baıqaýshylardyń ótinishi boıynsha kezdesýler ótip, onda saılaý barysyndaǵy zańdardyń oryndalýyn baqylaý, qoǵamdyq qaýipsizdikti qamtamasyz etý máseleleri sóz bolýda»,-dedi M.Jeksenbekov.
