Májilis pen barlyq deńgeıdegi máslıhat depýtattarynyń saılaýy óz máresine jetti (FOTO)
Bul týraly búgin QR Ortalyq saılaý komıssııasynyń múshesi Marat Sársembaev málim etti.
«Astana ýaqytymen saǵat 18-00-degi jaǵdaı boıynsha tizimge engizilgen saılaýshylardyń 75,16 paıyzy daýys berdi. Bul bizdiń elde buryn bolǵan parlamenttik saılaýlar úshin rekordtyq kelý ekenin atap ótý qajet», - dedi ol.
Qazaqstandyqtar tańǵy 7-00-den bastap keshki saǵat 20-00-de deıin daýys berdi. 1 saǵat aıyrmashylyqqa baılanysty elimizdiń batys óńirindegi saılaý astana ýaqytymen saǵat 21-00-de aıaqtaldy.
Saılaýshylar elimizdiń barlyq óńirindegi 9840 saılaý ýchaskesinde, onyń ishinde Qazaqstannyń sheteldegi dıplomatııalyq ókildikteri janynan ashylǵan 65 saılaý ýchaskesinde daýys berdi. Aıta keterligi, Vashıngtonda, Nıý-Iorktegi jáne Ottavadaǵy saılaý ýchaskeleri óz jumystaryn Astana ýaqytymen 21 naýryz kúni saǵat tańǵy 6-00-de aıaqtaıdy.
Erteń, 21 naýryzda Qazaqstan halqy Assambelıasy atynan Májilis depýtattaryna saılaý ótedi.
Aıta keteıik, saıası dodaǵa barlyǵy alty partııa - «Nur Otan» partııasy, Qazaqstannyń «AQ JOL» demokratııalyq partııasy, «Aýyl» halyqtyq-demokratııalyq patrıottyq partııasy, Qazaqstan Kommýnıstik Halyq partııasy, Jalpyulttyq sotsıal-demokratııalyq partııasy jáne «Birlik» saıası partııasy qatysty.
Partııalyq tizimder boıynsha saılanatyn Parlament Májilisiniń 98 depýtaty, sondaı-aq oblystyq, Astana, Almaty qalalyq máslıhattarynyń 550 depýtaty, qalalyq máslıhattardyń 625 depýtaty jáne aýdandyq máslıhattardyń 2160 depýtaty saılanady.
Ortalyq saılaý komıssııasy QR Parlament Májilisiniń depýtattyǵyna úmitker retinde alty saıası partııanyń atynan 234 kandıdatty tirkedi.
QR-daǵy saılaýdy 964 halyqaralyq baıqaýshy qadaǵalady. Sonymen qatar ol daýys berý barysy men daýystardy sanaý rásimin baıqaýǵa kandıdattar men partııalardyń senim bildirgen adamdary, qoǵamdyq birlestikter, ÚEU, Qazaqstan Respýblıkasy buqaralyq aqparat quraldarynyń ókilderi qatysa aldy.
