Májilis Patent quqyǵy týraly shartty maquldady
ASTANA. 16 naýryz. QazAqparat /Qanat Mámetqazyuly/ -Búgin QR Parlamenti Májilisiniń jalpy otyrysynda palata depýtattary «Patent quqyǵy týraly shartty ratıfıkatsııalaý týraly» zań jobasyn maquldady. Atalǵan shart 2000 jylǵy 1 maýsymda Jenevada qabyldanǵan.
«Búgingi ǵylymı-tehnıkalyq jańalyqtar kúndelikti turmysymyzǵa qoldanysqa enip, keńirek paıdalanylyp jatqan ýaqytta zııatkerlik menshik salasyndaǵy úderisterdiń mańyzy kún saıyn artyp keledi. Halyqaralyq patentteý salasyn qorǵaý jáne ony ary qaraı jetildirý eń aldymen álemde bar úzdik tehnologııalardy qoldaý bolyp tabylady. Bul úshin ár memleket zııatkerlik menshikti qorǵaýdy qamtamasyz etýleri qajet. Osy rette Patent quqyǵy týraly shartty ratıfıkatsııalaý - basqa memleketter qosylǵan halyqaralyq sharttardy qabyldaı otyryp, sheteldik ónertapqyshtardyń aldynda tıisti mindettemeler alyp, bizdiń ónertabystarymyzdy shet elderde qorǵaýdy qamtamasyz etý bolyp tabylady», - dedi zań jobasy boıynsha baıandaǵan Ádilet mınıstriniń orynbasary Ámirhan Amanbaev.
Onyń aıtýynsha, zań jobasynda shetelderde qazaqstandyq ónertapqyshtarǵa patentter alý jáne sheteldikterdiń Qazaqstanda patentter alý jónindegi biryńǵaı qaǵıdalary men erejeleri qamtamasyz etiledi. «Búgingi kúnge deıin ónertabysta halyqaralyq patent alý 1970 jylǵy Vashıngton qalasynda kelisilgen patenttik korporatsııa boıynsha júzege asyrylyp kelgen. Buǵan 142 memleket qatysqan bolatyn. Al Qazaqstan 1990 jyldardyń basynda Eýrazııalyq patenttik konventsııaǵa qosylǵan edi. Buǵan postkeńestik memleketterdiń 9-y qatysady», - dedi Á. Amanbaev.
Májilis maquldaǵan zań jobasy Parlament Senatyna jiberiledi.
