Májilis parlamenttik tyńdaýlardyń taqyryptaryn bekitti
ASTANA. QazAqparat - Búgin QR Parlamenti Májilisiniń jalpy otyrysynda palata depýtattary altynshy saılanǵan Parlament Májilisiniń ókilettikterin iske asyrýdyń úshinshi sessııaǵa arnalǵan negizgi is-sharalar josparynyń jobasyn bekitti, dep habarlaıdy QazAqparat.
«Altynshy saılanǵan Parlament Májilisiniń ókilettikterin iske asyrýdyń úshinshi sessııaǵa arnalǵan negizgi is-sharalar josparynyń jobasy Memleket basshysy Nursultan Nazarbaevtyń jańa úshinshi sessııasyn ashý kezinde bergen tapsyrmalaryna sáıkes, Ult josparynyń oryndalýyn qamtamasyz etý maqsatymen ázirlengenin atap ótkim keledi. Jospar jobasy ázirlengende barlyq turaqty komıtetterdiń usynystary eskerilip, solardyń negizinde pysyqtaldy. Jalpy, jospar alty taraýdan turady. Osy sessııada aldymyzda turǵan kókeıkesti mindetterden týyndaıtyn asa mańyzdy is-sharalardy qamtıdy», - dedi Májilis tóraǵasynyń orynbasary Gúlmıra Isımbaeva.
Belgili bolǵandaı, sessııa barysynda úsh parlamenttik tyńdaý ótkizý josparlanýda. Atap aıtqanda, «Memlekettik tildiń latyn grafıkasyndaǵy álipbıiniń biryńǵaı standartyn engizý máseleleri týraly», «Qazaqstan Respýblıkasynyń eldi mekenderin sapaly aýyz sýmen qamtamasyz etýdiń ózekti máseleleri», sondaı-aq «Jumyspen qamtý salasyndaǵy problemalar jáne ony damytý perspektıvalary» atty taqyryptary boıynsha parlamenttik tyńdaý ótedi.
«Sonymen qatar komıtetterdiń 14 kóshpeli otyrysy, úsh konferentsııa ótkizý kózdelgen. Sessııanyń birinshi jartysynda segiz Úkimet saǵatyn ótkizý belgilenip otyr. Keń aýqymdaǵy jurtshylyq ókilderiniń, azamattyq sektordyń qatysýymen zań jobalaryn, basqa da ózekti máselelerdi jan-jaqty talqylaý maqsatynda 15 dóńgelek ústel ótkizý usynyldy. Májilis depýtattarynyń halyqaralyq jáne parlamentaralyq qyzmetke qatysý sharalary da qamtylǵan», - dedi G. Isımbaeva.
