Májilis: Parlamenttik oppozıtsııaǵa kepildik beretin qadamdar maquldandy
NUR-SULTAN. QazAqparat – Parlament Májilisiniń jalpy otyrysynda «Qazaqstan Respýblıkasynyń Parlamenti jáne onyń depýtattarynyń mártebesi týraly» Qazaqstan Respýblıkasynyń Konstıtýtsııalyq zańyna tolyqtyrýlar engizý týraly» Konstıtýtsııalyq zańynyń jobasy maquldandy, dep habarlaıdy QazAqparat tilshisi.
«Atalǵan zań jobasy Prezıdent Qasym-Jomart Toqaevtyń Ulttyq qoǵamdyq keńestiń otyrysynda «parlamenttik oppozıtsııa» ınstıtýtyn zańnamalyq bekitý týraly tapsyrmasyn oryndaý maqsatynda daıyndaldy. Memleket basshysynyń atalǵan tapsyrmasyn paıdalanyp, «Aq jol» partııasy aldyn ala daıyndaǵan parlamenttik oppozıtsııa týraly zań jobasyn qazirgi jaǵdaıdyń talaptaryna sáıkes qaıta jańartty. Zań jobasy fraktsııa depýtattarynyń saparlary barysynda jergilikti jáne ulttyq deńgeıinde saılaýshylardyń, ǵalymdardyń ári saıası qoǵam ókilderiniń talqylaýynan ótti. Talqylaý jumystary buqaralyq aqparat quraldarynda jarııalandy», - dedi Májilisiniń depýtaty Azat Perýashev.
Zań jobasynyń negizgi maqsaty - qoldanystaǵy zańnamada «parlamenttik kópshilik» jáne «parlamenttik oppozıtsııa» uǵymdaryn bekitý boıynsha quqyqtyq negizderdi qamtamasyz etý.
Máselen, parlamenttik oppozıtsııaǵa qandaı da bir másele boıynsha óz ustanymyn bildirýge kepildik berý maqsatynda zań jobasynda saıası partııalar fraktsııalary basshylarynyń Parlament Palatalarynyń birlesken otyrystarynda, Parlament Májilisiniń jalpy otyrystarynda, turaqty komıtetterdiń, jumys toptarynyń otyrystarynda, parlamenttik tyńdaýlar men ózge de is-sharalarda sóz sóıleýge kepildik berilgen quqyǵyn bekitý kózdeledi.
Zań jobasymen parlamenttik oppozıtsııaǵa Parlament Májilisiniń Reglamentinde kózdelgen tártippen kúntizbelik jylda keminde bir parlamenttik tyńdaý ótkizýge bastamashylyq jasaý, sondaı-aq parlamenttik sessııada keminde eki ret «úkimet saǵattarynyń» kún tártibin aıqyndaý quqyǵy beriledi.
«Kez kelgen parlamenttik is-sharalarda parlamenttik kópshiliktiń orny, róli sheshýshi ekenin jaqsy bilemiz. Al osy zań jobasynyń maqsaty – parlamenttik oppozıtsııanyń quqyqtaryn iske asyrý. Qoǵamdy alańdatatyn problemalardy kóshede emes, Parlament qabyrǵasynda kótergen durys dep sanaımyz. Sol úshin oppozıtsııaǵa keminde sessııa saıyn ózekti taqyryptardy parlamenttik tyńdaý deńgeıinde kóterýge múmkindik berý kerek», - Perýashev.
Óz kezeginde Májilis Tóraǵasy Nurlan Nyǵmatýlın atalǵan máselege qatysty pikir bildirdi.
«Menińshe, bul normanyń basqa normalarmen salystyrǵanda úlken aıyrmashylyǵy bar. Endi zań deńgeıinde parlamenttik oppozıtsııa keminde bir ret osy bizdiń parlamenttik tyńdaýǵa bastamashy bolýyna múmkindik beredi. Ol buryn bolmaǵan, sondyqtan bul qadam mańyzdy», - dedi N. Nyǵmatýlın.
