Májilis Parlamentke jańa saılaý taǵaıyndaý týraly bastama kóterdi
ASTANA. QazAqparat - QR Parlamenti Májilisi Parlamentke jańa saılaý taǵaıyndaý týraly bastama kóterdi. QR Parlamenti Májilisiniń depýtattarynyń Parlament Májilisi men barlyq deńgeıdegi máslıhat deptýattarynyń kezekten tys saılaýyn ótkizý týraly úndeýi mátinin jarııa etken depýtat Nurlan Ábdirov osylaı dedi.
«Búginde jahandyq júıeli daǵdarys álemniń barlyq elderin, tipti damyǵan jetekshi memleketterdi de qamtýda. Álemdegi kúrdeli geoekonomıkalyq jáne geosaıası ahýal halyqaralyq shıelenistiń artýymen, jańa qaqtyǵys oshaqtarynyń paıda bolýymen, lańkestik qaýip-qaterdiń kúsheıýimen qatar órbýde. Qazaqstan egemen el retinde damyp kele jatqan 25 jyldyń ishinde álemdik daǵdarystardyń syn-qaterlerimen san márte betpe-bet keldi jáne biz olardyń barlyǵyna laıyqty toıtarys bere bildik. Tipti, biz ondaı kezeńderdi árdaıym damýdyń jańa sapalyq deńgeıine shyǵýdyń múmkindigi retinde paıdalana bildik. Sol sebepti bizdiń elimiz árqashan, árbir daǵdarystan jańǵyrǵan, qýatty el bolyp shyǵyp keledi», - dedi ol.
Depýtat jarııa etken úndeýde qazir de Qazaqstannyń jańa jahandyq syn-qaterlerdi eńseretin naqty josparlary bar ekendigi aıtylǵan.
«Elbasy, Memleket basshysy Nursultan Ábishuly Nazarbaevtyń saıasatynyń arqasynda elimizdiń tek álemdik daǵdarysqa qarsy turýy jóninde ǵana emes, jańa jahandyq naqty ahýal jaǵdaıynda damýy týraly strategııasy men naqty Ult jospary bar. Búgin keıinge qaldyrmaıtyn jedel sharalar ýaqyty. Osyǵan baılanysty qazirden bastap jańa reformalardy júzege asyrýǵa jedel kirisý úshin, sonymen birge daǵdarysqa qarsy sharalardy tıimdi júzege asyrý úshin biz, 5-shi shaqyrylymdaǵy Májilistiń ókilettigin merziminen buryn toqtatý jáne Parlamentke jańa taǵaıyndaý saılaý týraly bastama kóteremiz», - dedi úndeýdi jarııalaǵan N.Ábdirov.
