Májilis Ozon qabatyn buzatyn zattar jónindegi Monreal hattamasyna engizilgen túzetýlerdi maquldady
ANA. 2 naýryz. QazAqparat /Qanat Mámetqazyuly/ - Búgin QR Parlamenti Májilisiniń jalpy otyrysynda palata depýtattary «Kopengagende 1992 jylǵy 23-25 qarashada qol qoıylǵan Ozon qabatyn buzatyn zattar jónindegi Monreal hattamasyna túzetýlerdi
jáne Monrealda 1997 jylǵy 15-17 qyrkúıekte qol qoıylǵan Ozon qabatyn buzatyn zattar jónindegi Monreal hattamasyna túzetýlerdi ratıfıkatsııalaý týraly» zań jobasyn maquldady. Qujat Parlament Senatyna jiberiledi.
Qazaqstan Ozon qabatyn qorǵaý týraly Vena konventsııasyna jáne Ozon qabatyn buzatyn zattar jónindegi Monreal hattamasyna 1998 jyly qosylǵan bolatyn. Bul qujatqa qosyla otyryp, Qazaqstan qarjy resýrstaryna jáne ozyq elderdiń ozondy buzatyn zattardy tutyný deńgeıin qysqartý men ozon qabaty buzylýynyń, onyń halyq ómirine áser etýiniń yqtımal qaterin bolǵyzbaý salasyndaǵy tájirıbesine qol jetkizetin bolady.
Jalpy alǵanda, Ozon qabatyna júrgizilgen baqylaýlar onyń buzylý qaýpiniń ulǵaıǵanyn deleldegen. Sondyqtan da ozondy buzatyn zattardyń qosymsha tizimin retteý týraly sheshim Monreal hattamasymen engizilgen bolatyn. Al búgingi qarastyrylyp otyrǵan Monreal hattamasyna Kopengagen túzetýi 1992 jyly 23-25 qarashada qabyldandy. Onda gıdrohlorftorkómirtekter men gıdrobromftorkómirtekterdiń, sondaı-aq bromdy metıldiń qosymsha tizimin retteý sharalary aıqyndalady. 1997 jylǵy 15-17 qyrkúıekte qabyldanǵan túzetý ozondy buzatyn zattardyń ımporty men eksportyn lıtsenzııalaý júıesin ornatýǵa qoıylatyn talaptardy qamtıdy. Bul rette Monreal túzetýi Kopengagen túzetýiniń taraptary bolyp tabylmaıtyn elderge bromdy metıldiń ımporty men eksportyna saýda-sattyqqa tyıym salýdy da engizedi.
