Májilis ózge memlekettermen qarym-qatynasta Qazaqstan múddesin qorǵaıtyn qujatty maquldady
NUR-SULTAN. QazAqparat – Parlament Májilisiniń jalpy otyrysynda «Qazaqstan Respýblıkasynyń halyqaralyq sharttary týraly» QR Zańyna ózgerister men tolyqtyrý engizý týraly» zań jobasy maquldandy, dep habarlaıdy QazAqparat tilshisi.
Zań jobasy Konstıtýtsııanyń 4-babynyń 3-tarmaǵyna 2017 jylǵy engizilgen ózgeristermen qatar bekitilgeli otyrǵan Qazaqstan Respýblıkasy halyqaralyq sharttarynyń qoldanylý tártibi men sharttaryn aıqyndaý maqsatynda ázirlendi.
«Zań jobasyn qabyldaý beıindi zańǵa ratıfıkatsııalanǵan halyqaralyq sharttardyń Qazaqstan Respýblıkasy zańdarynyń aldyndaǵy basymdyǵy, mundaı halyqaralyq sharttardyń tikeleı qoldanylýy, jurtshylyqty halyqaralyq sharttardyń mártebesindegi ózgerister jóninde habardar etý týraly normalaryn engizýdi, sondaı-aq halyqaralyq sharttardy toqtatý tártibin retteýdegi olqylyqtardy joıýdy qamtamasyz etedi», - dedi QR Premer-Mınıstriniń orynbasary – Syrtqy ister mınıstri Muhtar Tileýberdi.
Sonymen qatar, zań jobasyn qabyldaý Qazaqstan Respýblıkasynyń aldyna alǵan mindettemelerin oryndamaıtyn memlekettermen jáne halyqaralyq uıymdarmen ózara qarym-qatynastarda Qazaqstan Respýblıkasynyń múddelerin eskerýdi qamtamasyz etedi.
«Kórsetilgen máselelerdi beıindi zańǵa basqa memleketter men halyqaralyq uıymdar Qazaqstan Respýblıkasynyń aldyna alǵan mindettemelerin oryndamaǵan jaǵdaıda halyqaralyq sharttardy oryndaýdy toqtata turý túrindegi jaýap sharalar qabyldaýyn kózdeıtin normalar engizý arqyly sheshý usynylady», - dedi mınıstr.
